Dietrich Mateschitz

Dietrich Mateschitz (20 Mei 1944 – 22 Oktober 2022), ook bekend as Didi Mateschitz, was 'n Oostenrykse entrepreneur en miljardêr. Sy onderneming Distribution & Marketing GmbH is in besit van 49 persent van die aandele van Red Bull GmbH, die vervaardiger van die wêreld se gewildste kafeïen-bevattende koeldrank Red Bull.

Lewe
Red Bull GmbH se hoofkwartier in Fuschl am See in die deelstaat Salzburg.

Mateschitz het 'n akademiese graad by die Hochschule für Welthandel (Universiteit vir Wêreldhandel) in Wene verwerf. Daarna was hy onder meer as handelsverteenwoordiger vir Jacobs Kaffee (tans 'n handelsmerk van Mondelēz International) en die tandepastavervaardiger Blendax werksaam. In 1984 het hy saam met sy Thailandse vennote Chaleo en Chalerm Yoovidhya die onderneming Red Bull GmbH ("Red Bull Bpk") gestig. Hulle het die resep vir 'n gewilde Thailandse koeldrank, Krating Daeng, aangepas en 'n bemarkingkonsep ontwikkel wat op die jeugmark en sportgeesdriftiges gefokus is. In 1987 is hul kafeïendrank Red Bull op die mark bekend gestel wat binne enkele jare tot die leidende handelsmerk op die wêreldmark van kafeïen-bevattende energiedranke gegroei het. Red Bull is tans die bekendste Oostenrykse handelsmerk.

Min is bekend oor Mateschitz se privaat lewe. In 1993 is 'n seun vir hom gebore.[1]

Volgens die tydskrif Forbes Magazine word Mateschitz se fortuin op VSA-$ 13,4 miljard beraam wat van hom die rykste Oostenryker maak. Op die lys van die wêreld se rykste mense is hy in 2017 86ste geranglys.[2][3]

Verwysings
  1. "Bilanz.ch, 30 Maart 2004: Onderhoud met Dietrich Mateschitz: «Das Original ist das Mass aller Dinge». Besoek op 22 Maart 2017". Geargiveer vanaf die oorspronklike op 29 November 2017. Besoek op 22 Maart 2017.
  2. http://www.forbes.com/billionaires/list/2/#version:static
  3. Forbes.com: Mateschitz
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.