Die Nuwe Groep

Die Nuwe Groep het in 1938 in Suid-Afrika ontstaan toe 'n groep jong kunstenaars saamgestaan het om teen die konvensionele, ouderwetse kunsopvattings van die kritici en die publiek te rebelleer.[1]

Die grootste rede waarom die Suid-Afrikaanse publiek nie met nuwe kunsrigtings wou konformeer nie, was dat die gesaghebbendste en invloedrykste figuur in die Suid-Afrikaanse kunswêreld sedert die einde van die 19e eeu, Edward Roworth, 'n voorstander van die Britse akademiese tradisie gebly het.

Roworth was hoogleraar in die skone kunste aan die Universiteit van Kaapstad, asook president van die Suid-Afrikaanse Vereniging van Kunstenaars en direkteur van die Suid-Afrikaanse Nasionale Kunsgalery. Die lede van die Nuwe Groep het hulle egter daarvoor beywer om nuwe kunsrigtings onder die aandag van die Suid-Afrikaanse kritici en publiek te bring.

Die 6 stigterslede van die groep was Gregoire Boonzaier (geb. 1909), Freida Lock (1902-1962), Terence McGaw (geb. 1913), Lippy Lipshitz (geb. 1903), Walter Battiss (1906-1982) en Alexis Preller (geb. 1911). Hulle het hulle eerste uitstalling saam met 17 genooide kunstenaars in Mei 1938 in Kaapstad gehou.

Verwysings
  1. https://www.sahistory.org.za/article/new-group

Bronnelys
  • Wêreldspektrum, 1982, ISBN 0908409621, volume 21, bl. 71
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.