Die Gelukswiel (tarotkaart)

Die Gelukswiel is die tiende troefkaart in tarotkaartspeletjies en die tiende Groot Arcana-kaart in pakke vir waarsêery. Dit word in albei gebruik.

Die Gelukswiel (X) van die Rider-Waite-tarotpak.

Beskrywing

Volgens A.E. Waite se boek van 1910 Pictorial Key to the Tarot het Die Gelukswiel verskeie betekenisse in waarsêery:[1]

10 GELUKSWIEL – lot, fortuin, sukses, verheffing, geluk, geluksaligheid. Omgekeer – toename, oorvloed, oortolligheid.

Die Gelukswiel verskil nes ander kaarte van die Groot Arcana grootliks tussen verskillende pakke kaarte. Dit is sedert vroeë tye geskoei op die begrip Rota Fortunae, die wiel van die godin Fortuna. Dit het gewoonlik ses of agt speke.

Soms kom die letters T-A-R-O (kloksgewys) of T-O-R-A (antikloksgewys) op vier van die speke voor; dit kan ook vertolk word as R-O-T-A, die Latynse woord vir "wiel". Soms, soos op die Rider-Waite-tarotpak, is daar bykomende simbole wat die vier klassieke elemente verteenwoordig: aarde, lug, vuur en water. Op laasgenoemde kaart is daar ook 'n afbeelding van die god Anoebis aan die regterkant van die wiel, terwyl die slangagtige Tifon links afseil. Op die wiel wissel die Hebreeuse letters י-ה-ו-ה die letters T-A-R-O af; dit word gewoonlik as YHWH getranslitereer. (Dit is Yahweh, die Hebreeus vir God.

Vertolking

'n Algemene aspek in die meeste vertolkings van die kaart is verandering in 'n mens se lewe, in sy plek, posisie of geluk: dié wat ryk is, kan byvoorbeeld arm word en dié wat arm is, kan ryk word.[2][3]

Verwysings
  1. Waite, Arthur Edward, 1857-1942. (2005). The pictorial key to the tarot. Mineola, NY: Dover Publications. ISBN 0-486-44255-1. OCLC 57549699.{{cite book}}: AS1-onderhoud: meer as een naam (link)
  2. Reed, Ellen Cannon: The Witches Tarot, Llewellyn, 1989
  3. Wood, Robin:The Robin Wood Tarot, Robin Wood Publishing, 1998

Skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.