Die Gehangde Man (tarotkaart)

Die Gehangde Man is die twaalde troefkaart in tarotkaartspeletjies en die twaalfde Groot Arcana-kaart in pakke vir waarsêery. Dit word in albei gebruik.

F

Die Gehangde Man (XII) van die Rider-Waite-tarotpak.

Die prent op die kaart is van 'n man wat onderstebo opgehang is, gewoonlik aan die een enkel. In die Tarocco Siciliano is die man aan sy nek gehang. Die uitdrukking op sy gesig dui aan hy is daar uit eie aandrang, en die kaart is veronderstel om selfopoffering te verteenwoordig eerder as straf vir 'n misdaad.

In sommige pakke is Die Gehangde Man 'n uitbeelding van die Noorse god Odin, wat homself aan 'n boom gehang het om kennis op te doen. Daar is ook 'n Christelike vertolking, wat Judas Iskariot uitbeeld met 'n sak silwermunte in sy hande.

Beskrywing

Moderne weergawes van die kaart wys 'n man wat onderstebo aan sy een voet opgehang is, soms van 'n houtbalk (soos 'n kruis of balk) en soms van 'n boom.

In A.E. Waite se boek van 1910 Pictorial Key to the Tarot skryf hy oor die Rider–Waite-kaart:

Die galg waaraan die man hang, vorm 'n T-kruis, terwyl die posisie van die bene 'n hakekruis vorm. Daar is 'n halo om die kop van die oënskynlike martelaar. Daar moet op gelet word (1) dat die boom 'n lewende boom is, met takke aan; (2) dat die gesigsuitdrukking vervoering is, nie lyding nie; (3) dat die figuur as 'n geheel lewe in suspensie te kenne gee, maar lewe en nie die dood nie. [...] Dit word valslik 'n kaart van martelaarskap genoem, 'n kaart van versigtigheid, 'n kaart van die Groot Werk, 'n kaart van plig [...] Ek sal sê dit beeld die verhouding uit, in een van sy aspekte, tussen die goddelike en die heelal.[1]

Volgens Waite het die kaart verskeie betekenisse in waarsêery:[2]

12 DIE GEHANDE MAN – wysheid, besonnenheid, onderskeidingsvermoë, beproewings, opoffering, intuïsie, voorgevoel, profesie. Omgekeer – selfsugtigheid, die skare, die staatsbestel.

Daar is 'n helder halo om die man se kop, wat dui op geleerde wysheid of 'n verligting.[3]

In astrologie word Die Gehangde Man verbind met die planeet Neptunus en die diereriemteken Visse.[4]

Die kaart kan onbaatsugtigheid, selfontsegging, 'n sekere belangeloosheid in wêreldse dinge simboliseer. Dit is passiwiteit en die tyd om dinge alleen te los.[5]

Verwysings
  1. Waite, A. E. The Pictorial Key to the Tarot, ill. deur Pamela Colman Smith [1911], by sacred-texts.com
  2. Waite, Arthur Edward (1979). The Pictorial Key to the Tarot. New York: Samuel Weiser. p. 285. ISBN 0-87728-218-8.
  3. Gray, Eden. "Complete Guide to the Tarot." 1970. Crown Publishers, New York, NY.
  4. "The Hanged Man Tarot Card". askAstrology.
  5. "Meaning of The Hanged Man by The Tarot Card". Powgoddess.

Skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.