Die Duiwel (tarotkaart)

Die Duiwel is die 15de troefkaart in tarotkaartspeletjies en die 15de Groot Arcana-kaart in pakke vir waarsêery. Dit word in albei gebruik.

Die Duiwel (XV) van die Rider-Waite-tarotpak.

Beskrywing

In die Rider-Waite-tarotpak is Die Duiwel deels geskoei op Eliphas Levi se illustrasie van "Bafomet" in sy Dogme et Rituel de la Haute Magie (1855). Hy het krultone, ramhorings, die vlerke van 'n vlermuis en 'n omgekeerde pentagram op sy voorkop. Sy regterhand wys na bo en sy linkerhand met 'n fakkel in wys na onder. Hy hurk op 'n reghoekige staander. Twee naakte demone (een manlik en die ander vroulik) met sterte is aan die staander vasgeketting. Levi se Bafomet het menslike en dierlike eienskappe: die vlerke van 'n vlermuis, die horings van 'n bok, 'n opgeligte regterhand, 'n linkerhand wat na onder wys, borste en 'n fakkel bo sy kop.

Baie moderne pakke beeld Die Duwel uit as 'n sateragtige wese. Volgens A.E. Waite staan Die Duiwel op 'n altaar.[1] In tarotpakke voor Eliphas Levi, soos die Tarot van Marseille, het Die Duiwel borste, 'n gesig op sy maag, oë op sy knieë, leeupote en geslagsdele. Hy het ook vlermuisagtige vlerke, horings en 'n staf. Twee wesens met horings, hoewe en sterte is aan sy ronde staander vasgemaak.

Vertolking

Volgens A.E. Waite se boek van 1910 Pictorial Key to the Tarot het Die Duiwel verskeie verbintenisse in waarsêery:[2]

15 DIE DUIWEL – verwoesting, geweld, venyn, buitengewone inspanning, dwang, onheil. Omgekeer – bose onheil, swakheid, kleinlikheid, blindheid.

In astrologie word Die Duiwel verbind met die planeet Saturnus en die diereriemteken Steenbok.[3]

Verwysings
  1. The Pictorial Key to the Tarot, deur Arthur Edward Waite
  2. Waite, Arthur Edward (1979). The Pictorial Key to the Tarot. New York: Samuel Weiser. pp. 285–286. ISBN 0-87728-218-8.
  3. Farley, Helen (2009). A Cultural History of Tarot. I. B. Tauris. doi:10.5040/9780755697700. ISBN 978-1-84885-053-8.

Skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.