Daugavpils

Daugavpils (Duits: Dünaburg) is die tweede grootste stad van Letland met 'n oppervlakte van 72,48 vierkante kilometer en 'n bevolking van 104 870 mense (soos op 1 Januarie 2009). Die stad is in die suidooste van Letland langs die Daugava-rivier geleë en beskik oor 'n universiteit.

Daugavpils
Kaart	Wapen
	Vlag
Land	Letland
Administratiewe gewes	Daugavpils Stad
Koördinate	55°53′N 26°32′O
Stigting	1275
Duitse naam	Dünaburg
Finse naam	Väinänlinna
Oppervlakte:
- Totaal	72,48 vk km
Hoogte bo seevlak	105 m
Bevolking:
- Totaal (2016)	95 467[1]
- Bevolkingsdigtheid	1446,9/vk km
Etniese groepe:
- Russies	53,96%
- Lette	17,3%
- Pole	14,9%
Tydsone	EET (UTC+2)
- Somertyd	EET (UTC+3)
Amptelike webwerf	www.daugavpils.lv

Die verskeidenheid name, wat Daugavpils reeds in sy geskiedenis gedra het, weerspieël die belang wat Europese moondhede as veroweraars in Letland gestel het. Die stad is oorspronklik in die 13de eeu as Dünaburg deur ridders van die Duitse Orde gestig. Die Pole het dit later Dvinsk genoem, terwyl die Russiese tsare, wat die gewes Letgalle vanaf 1772 by hul ryk ingelyf het, die naam Borisoglebsk ingevoer het.

Die Universiteit van Daugavpils

Dikwels het die veroweraars hul veldslagte in of naby Daugavpils gevoer, en tydens die Tweede Wêreldoorlog is die stad selfs volledig verniel. Die Sowjet-maghebbers het min omgegee vir Daugavpils se argitektoniese erfenis en die stad vanaf 1945 as 'n nywerheidsentrum met eenvormige woonstelblokke heropgebou.

Die vestiging van nuwe nywerhede was aan die immigrasie van werkers uit ander dele van die Sowjetunie verbonde sodat tans sewe uit elke tien inwoners etniese Russe is. Daarnaas gee ook die historiese stadskern se tipies klassisistiese straatrooster, wat in die vroeë 19de eeu aangelê is en voorsiening vir besonder breë strate gemaak het, 'n sterk Russiese voorkoms aan Daugavpils.

Met die Sjoa het Daugavpils ook sy sterk Joodse invloed ingeboet. Voor 1940 is die stad merendeels deur Joodse burgers bewoon, maar hiervan het in 1945 slegs 492 mense oorleef. Vandag bly die demografiese erfenis van die Sowjet-tydperk 'n vraagstuk - baie etniese Russe is verbitter dat hulle ná die onafhanklikwording van Letland dikwels as vreemdelinge beskou word.