Charles Darter

Charles James Darter is in 1870 in Kaapstad gebore en het tydens die Tweede Vryheidsoorlog as 'n koloniale vrywilliger by die Engelse magte aangesluit waarna hy tot die rang van luitenant gevorder het in die "Namaqualand Border Scouts".

Op 18 Maart 1902 was hy met 'n verkenningstog vanaf sy basis in Garies te perd op pad in die rigting van Kamieskroon toe hy deur 'n Boere-skerpskutter in Brandewynkopkloof suid van Kamieskroon doodgeskiet is. Hy is op die plek waar hy geskiet is begrawe en 'n gewilde storie oor die gebeure wou dit hê dat die gebied rondom die graf aan Brittanje sou behoort en die kleinste stukkie Britse grondgebied in die wêreld is.

Die betrokke stukkie grond waarop die graf vandag te sien is, is egter op 3 November 1906 deur die Suid-Afrikaanse regering van die destydse eienaar onteien en behoort dus aan die staat. Dit was destyds ongeveer 128 vierkante meter groot en kan dus moontlik die kleinste stukkie Suid-Afrikaanse grond met sy eie titelakte wees.

Die hoef van die perd waarop luitenant Darter gery het en wat saam met hom doodgeskiet is, is vandag op uitstalling in die bekende Springbok Kafee op Springbok.