Cleopatra se Naald

Cleopatra se Naald is een van drie antieke, meer as 3 000 jaar oue Egiptiese gedenknaalde (obeliske). Een staan op die Victoria Embankment in Londen, een op die Place de la Concorde in Frankryk en die derde een in Central Park in New York.[1] Die gedenknaalde is in die 19e eeu opgerig nadat dit deur Egipte aan hierdie stede geskenk is.

Cleopatra se Naald te Londen
Obelisk op die Place de la Concorde in Frankryk
Obelisk in Central Park, New York

Die obeliske is van rooi graniet gemaak en van hiërogliewe voorsien. Hoewel die naam voorstel dat dit met die ryk van Cleopatra VII te make het, is die obeliske oorspronklik al in 1450 v.C. in opdrag van Toetmoses III opgerig. Aanvanklik het dit in Heliopolis gestaan.

Die graniet waarvan die obeliske gemaak is, is uit Aswan afkomstig. Die inskripsies op die pilare is 200 jaar later deur Ramses II aangebring om sy militêre oorwinnings te gedenk. In die tyd van Cleopatra VII is die obeliske ter ere van Marcus Antonius na die Caesarium in Alexandrië verskuif.

Verwysings
  1. HAT Taal-en-feitegids, Pearson, Desember 2013, ISBN 978-1-77578-243-8

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.