Chicxulub-krater

Die Chicxulub-krater (uitspraak: tʃ|iː|k|ʃ|ə|l|uː|b) is ’n prehistoriese slagkrater in die see onder die Yucatán-skiereiland in Mexiko.[1] Sy middelpunt lê naby die dorp Chicxulub, waarna dit genoem is. Die ouderdom van die asteroïde-impak en die Kryt-Paleogeen-grens (K-Pg-grens) stem presies ooreen.[2] Die krater is 180 km breed en 20 km diep, en dit is dus een van die grootste impakkraters op Aarde. Die hemelliggaam wat dit veroorsaak het, se deursnee was minstens 10 km.

Beelde van Nasa se Shuttle Radar Topography Mission STS-99 wys ’n deel van die 180 km wye ring van die Chicxulub-krater.

Die krater is in die 1970's ontdek deur twee geofisici wat petroleum in die Yucatán gesoek het. Die ouderdom van die rotse wat deur die impak geraak is, wys die krater dateer uit sowat 66 miljoen jaar gelede, die einde van die geologiese periode Kryt en die begin van die Paleogeen-periode. Dit val saam met die K-Pg-grens, die geologiese grens tussen die Kryt en Paleogeen. Dit dui daarop dat die impak verantwoordelik was vir die Kryt-Paleogeen-uitwissing, waarin onder meer al die nievlieënde dinosourusse uitgesterf het.[3][4]