Bromanse

Bromanse is ’n regstreekse leenwoord van die Engelse bromance, wat, as kofferwoord, ontstaan het uit die samevoeging tussen die woorde bro / brother en romance. Hierdie term is deur Dave Carne, ’n redakteur, in die skaatsplanktydskrif, Big Brother, in die 1990’s bedink om spesifiek te verwys na die soort verhoudings wat tussen skaatsplankryers ontwikkel wat ’n lang tyd in mekaar se geselskap saam deurbring. [2]

’n Bromanse is ’n baie gehegte vriendskap tussen twee heteroseksuele mans; volgens die norm gewoonlik tussen twee heteroseksuele mans. Mans wat binne ’n bromantiese verhouding staan word soms van gesê dat hulle bromoseksueel is en mans liefkoos, selfs al is hul verhouding nié, trouens, seksueel van aard nie. Hegte vriendskappe tussen mans kan regdeur die eeue heen gevind word, maar die bromanse kom veral vandag meer algemeen voor, vanweë die groot getal mans wat enkellopend oor ’n geruime tyd bly eerder as om te trou of in seksuele verhoudings betrokke te raak.

Mans binne ’n bromanse ken mekaar oor ’n geruime tydperk en hulle koester ’n besonderse liefde, vertroue, respek en gevoelens teenoor mekaar. Dit is algemeen om bromanse in ’n vorm van fisiese affeksie uit te druk, soos om mekaar te karnuffel en te omhels, hoewel die verhouding baie dieper gewortel is as die uitdrukking van vriendskap op die oppervlak. Dikwels sal mans ook baie geheg aan mekaar se gesinne raak, tyd saam met hulle deurbring en hulself amper as deel van die gesin vereenselwig. Dit is ook nie ongewoon vir mans binne ’n bromanse om saam in ’n woning te bly nie; sodoende word voordeel uit hul vriendskap geput deur op die koop toe saam finansiële laste te dra en elkeen gevolglik individueel op huurgeld spaar.

Alle soorte aktiwiteite kan onder die vaandel van bromanse geniet word, hoewel daar ’n sterk klem geplaas word om vroue by hierdie aktiwiteite uit te sluit. Mans binne ’n bromanse kan saam ’n drankie geniet, kook of eet, televisie of rolprente kyk, sportbyeenkomste bywoon, deelneem aan sport of hul lewenservaringe met mekaar deel; partykeer in die samesyn van ander mans of soms meer geïsoleerd as ’n paartjie. Vele bromanse begin al nadat die hoërskoolloopbaan voltooi is, tydens ’n tydperk van toenemende sosialisering. Hierdie vriendskapsverhouding word lewenslank behou, selfs al trou die mans met ander langtermyn lewensmaats.

Bromanse word maklik met homoseksualiteit verwar. By bromanse is daar geen seksuele aangetrokkenheid tussen twee geslaggenote nie, terwyl dit ’n vereiste by homoseksualiteit is.

Homososiale verhoudings (oftewel vriendskappe tussen mense van dieselfde geslag) vervul gewoonlik die sosiale leemte wat gelaat word deur nie in seksuele verhoudings betrokke te raak nie; gevolglik sal homososiale verhoudings geneig wees om te kwyn sodra een van die vriende trou en/of oor ’n latere stadium in ’n seksuele verhouding met iemand anders betrokke raak. In teenstelling met hierdie konsep, bly die hegte vriendskapsband wat in bromanse gevorm is voortbestaan, deurdat die betrokkenes in hierdie tipe homososiale verhouding ook hul tyd aan mekaar se gesinne afstaan, mekaar bystaan en partykeer ondernemingsvennootskappe sal aangaan.

Bromanse word deur party gemeenskappe verwerp, veral by diesulkes wat hierdie verhoudings as onmanlik bestempel. In gebiede waar die stigma teen homoseksualiteit veral fel is (en daar verkeerdelik enige waarneembare verhouding tussen mans as homoseksueel afgeskiet sal word) sal mans in ’n bromanse soms gedwing mag word om hul manlikheid te bewys indien hul nog deur die gemeenskap aanvaar wil word. In ander wêrelddele word bromanse aanvaar en soms openlik verwelkom, daar ’n lojale maat as waardevol gereken word.

Bromanse kan daarom bewoord word as die intiemste vriendskaplike verhouding tussen twee of meer mans, waarvan die seksuele element afwesig is. Bromanse word egter maklik deur die samelewing met homoseksualiteit verwar, omrede die buitestaanders nie altyd kan onderskei of ’n verhouding tussen twee (of meer) mans op vriendskaplike liefde of erotiese liefde gegrond is nie. So kan ’n lang, intieme omhelsing of soengroet (as fisiese kontak) of groot hoeveelheid tyd tussen twee mans wat baie geheg aan mekaar is, eenvoudig deur omstanders as homoseksueel geklassifiseer word, hoewel daar geen sprake van geslagsdrang tussen die twee is nie. Bromanse is nie slegs beperk tot enkellopende mans nie, omrede intieme vriendskappe tussen getroude mans ook mag voorkom.

Dit is die moderne aard en omstandighede van bromanse wat dit van die meer algemene homososiale verhoudings en geskiedkundige romantiese vriendskappe laat verskil. [3][4] Daar is talle voorbeelde van bekende intense manlike vriendskappe regdeur die Westerse geskiedenis te vinde en sulke vriendskappe het eweneens algemeen voorgekom. Dikwels word Aristoteles se klassieke omskrywing van vriendskap as ’n vroeë voorbeeld van die moderne bromanse beskou. Hy het omstreeks 300 v.C. geskrywe: Dit is diegene wat die goedheid van hul vriende om vriendskapsonthalwe begeer wat die werklike ware vriende is, omrede elkeen die ander liefhet vir wie en wat hy is en nie vir enige bykomstige karaktereienskap nie. [1] Daar word aangevoer dat, in die laat 19de eeu, dit die Freudianisme en die kopuitsteek van sigbare homoseksualiteit was wat daarop afgestuur het dat die heteroseksuele man dit ten alle koste probeer vermy het om uitdrukking van sy intense gevoelens teenoor ander mans openbaar te maak. [3] Navorsing oor vriendskappe en manlikheid het bewys dat die mans van die huidige geslagte wat deur feministiese moeders in die 1970’s grootgemaak is, meer uitdrukking aan hul emosies en gevoelens gee. [1] Hulle is ook minder gepla om as homofiele geëien te word en is sodoende meer op hul gemak om meer intieme vriendskappe met ander mans aan te knoop. [5][6] Navorsing in die Verenigde State doen aan die hand dat die neiging om “tradisionele sienings omtrent manwees” te verwerp, meer oorheersend onder mans van Anglo-Saksiese afkoms en die minste onder mans van Afrika-afkoms voorkom, met Hispaanse afstammelinge wat tussenin val. Ook is daar bevind dat mans wat ten sterkste die “tradisionele sienings omtrent manwees” aankleef, meer daartoe geneig is om aan aleksitimie te ly (’n moeilikheid om emosies te verstaan of daarmee te identifiseer). [7] ’n Ander medeoorsaak wat glo bromanse kan beïnvloed, is dat mans later trou. Deur ’n studie van die Rutgers University National Marriage Project is daar tot die gevolgtrekking gekom dat die gemiddelde trou-ouderdom van die eerste huwelik onder mans verhoog het vanaf 23 jaar in 1960 tot 27 jaar in 2007. Daar is ook die bevinding gemaak dat mans met meer onderrig geneig is om te wag tot hul 30’s voordat hulle hul in die eg verbind. [6]