Britney Spears

Britney Spears
	Britney Spears tydens 'n optrede by die NFL Kickoff Show in 2003.
Agtergrondinligting
Geboortenaam	Britney Jean Spears
Gebore	2 Desember 1981; McComb, Mississippi, VSA
Oorsprong	Kentwood, Louisiana, VSA
Genres	Pop
Beroep(e)	Sangeres, danseres, musiekskryfster, aktrise, skryfster
Instrumente	Stem, klavier
Jare aktief	1993 tot hede
Etikette	Jive, Zomba
Assosiasies	The New Mickey Mouse Club, Innosense (1997)
Webwerf	britneyspears.com; britney.com

Britney Jean Spears is 'n beroemde Amerikaanse sangeres, aktrise, skryfster en vermaaklikheidskunstenares. Sy is gebore op 2 Desember 1981 in McComb, Mississippi in die VSA. Sy het egter in Kentwood in Louisiana grootgeword. Sy is hoofsaaklik betrokke by popmusiek, waar sy die sang behartig. Haar stem word as soubrette beskryf.

Sy het roem verwerf toe sy in laat 1998 haar trefferliedjie ...Baby One More Time met 'n gepaardgaande musiekvideo waarin sy 'n Katolieke skoolmeisieuniform aan het, vrygestel het. In 1999 het sy haar debuutalbum met dieselfde naam vrygestel wat ewe suksesvol was. Sy was die eerste vroulike sangeres om beide haar debuutliedjie en debuutalbum op nommer een op die Billboard Hot 100 te hê. Snitte op die album wat as enkelsnitte vrygestel is, sluit in: ...Baby One More Time, Sometimes, (You Drive Me) Crazy, Born To Make You Happy, en From The Bottom Of My Broken Heart.

In 2000 het sy haar tweede nommer een-album vrygestel met die naam "Oops!...I Did It Again" wat die rekord hou vir die grootste verkope in die eerste week ooit vir 'n sangeres. Snitte op die album wat later as enkelsnitte uitgereik is, sluit in: Oops!...I Did It Again, Lucky, Stronger en Don't Let Me Be The Last To Know.

In 2001 het sy probeer wegbreek van haar onskuldige beeld met die vrystelling van haar derde nommer een-album, "Britney", wat haar 'n meer volwasse beeld sien uitstraal het. Die album het wel nommer een gehaal op die Billboard Hot 100, maar was aansienlik minder suksesvol in vergelyking met haar twee vorige albums. Sy hou die rekord vir die meeste nommer een-albums (drie altesaam) in 'n ry op die Billboard Hot 100. Suksesvolle snitte op die "Britney"-album wat as enkelsnitte vrygestel is, sluit in: "I'm A Slave 4 U, Overprotected/Overprotected (Darkchild Remix), Boys (The Co-Ed Remix)" en "I'm Not A Girl, Not Yet A Woman." Minder suksesvolle liedjies van die album sluit in: "Anticipating, I Love Rock 'N' Roll" en "That's Where You Take Me."

In 2002 het sy 'n film met die naam "Crossroads" vrygestel wat haar as aktrise probeer bekendstel het. Dit was nie goed ontvang deur kritici nie, maar het nog steeds wêreldwyd goed gedoen met kaartjieverkope. 2002 was 'n afkoelperiode vir Britney musiekgewys.

In laat 2003 is haar vierde album, "In The Zone," vrygestel. Dit was haar mees volwasse en seksuele album. Sy sing van orgies, monogamie en masturbasie onder andere. Dit het nommer een op die Billboard Hot 100 bereik en het terselfdertyd Britney se eie rekord van meeste nommer een albums (drie altesaam) in 'n ry op die Billboard Hot 100 gebreek. Alhoewel "In The Zone" nog minder suksesvol was as "Britney," het dit nog steeds drie wêreldwye nommer een treffers ("Me Against The Music; Toxic; Everytime") gelewer.

In 2004 het sy haar knie beseer tydens die maak van die musiekvideo van haar vierde liedjie van haar vierde album af, "Outrageous." Dit het haar vir maande buite aksie gelaat. Tydens hierdie tyd het sy met Kevin Federline, 'n danser, getrou. Hierdie jaar het sy haar eerste grootste treffers album vrygestel met die naam "Greatets Hits: My Prerogative." Sy het drie liedjies van hierdie album af vrygestel: "My Prerogative, Chris Cox Megamix" en "Do Somethin'."

In September 2005 het sy geboorte geskenk aan haar eerste kind, 'n seuntjie met die naam Sean Preston. Sy het 'n liedjie met die naam "Someday (I Will Understand)" vrygestel waarin sy sing van haar swangerskap. Hierdie jaar het sy ook haar eerste "remix" album vrygestel met die naam "B In The Mix: The Remixes." Daar is een liedjie vrygestel: "And Then We Kiss." Alhoewel dit nie 'n volwaardige vrygestelde liedjie was nie, het dit matige sukses beleef danksy baie radio lugtyd.

In September 2006 het sy geboorte geskenk aan haar tweede kind, weer 'n seuntjie. Hy is die naam Jayden James gegee. Musiekgewys was 2006 'n leë jaar. Sy het geen album of liedjie vrygestel nie.

2007 was veronderstel om haar terugkeer na musiek aan te kondig. In 2007 het sy na twee jaar van getroude lewe, aangekondig dat sy van Kevin Federline gaan skei. In September het sy haar eerste liedjie "Gimme More" van haar vyfde album "Blackout" vrygestel. Dit was dadelik 'n sukses en het nommer drie bereik op die Billboard Hot 100, haar beste vertoning op die Billboard Hot 100 sedert haar debuutliedjie "...Baby One More Time" nommer een in 1998 bereik het. Die liedjie word gekenmerk deur Britney se katastrofiese vertoning by die 2007 MTV Musiekvideotoekennings vir die liedjie se promosie waar sy nie die woorde van die liedjie geken het nie, haar danspassies vergeet het en oorgewig was, asook die musiek video waarin sy 'n ontkleedanser speel. "Blackout" is in November vrygestel. Daar is nog twee liedjie vrygestel: "Piece Of Me" en "Break The Ice." Alhoewel die album omtrent geen promosie gehad het nie en die minste verkoop het van haar albums, was dit die album van haar wat die beste ontvang is deur kritici. Dit was gelys onder Rolling Stone se top 50 albums van 2007.

Begin tot middel 2008 was 'n moeilike tyd vir Spears in haar persoonlike lewe. Sy het al die hare van haar skop af geskeer, daarna is sy rehabilitasiesentrum toe gestuur, haar kinders is van haar af weggeneem en sy is twee keer hospitaal toe gestuur vir sielkundige observasie.

Britney Spears tydens 'n optrede by die The Circus Starring: Britney Spears in 2009.

In die tweede helfde van 2008 het sy haarself begin reg ruk. In September het die 2008 Musiekvideotoekennings geopen terwyl sy stylvol en slank gelyk het. Sy het ook met al die toekennings waarvoor sy benoem was, weggeloop (video van die jaar, beste vroulike video en beste pop video). Sy het beperkte besoekregte gekry wat haar toelaat om haar kinders meer gereeld te sien. Sy het aangekondig dat sy haar sesde album, "Circus," op 2 Desember (haar verjaarsdag) sal vrystel. Die eerste liedjie wat van die album af vrygestel is, "Womanizer," was 'n weghol sukses. Dit het nommer een op die Billboard Hot 100 bereik. Dit is haar eerste nommer een liedjie op die Billboard Hot 100 sedert "...Baby One More Time" wat die posisie amper tien jaar gelede beklee het. Die titelsnit is gekies as die tweede enkelsnit wat van die album af vrygestel gaan word. Dit is in Desember vrygestel. Op 2 Desember het daar met die album 'n dokumentêre film van haar (genaamd "Britney: For The Record") op die televisie verskyn. Sy het in Maart 2009 met haar sewende konserttoer ("The Circus Starring: Britney Spears") begin. Dit sluit datums in Noord-Amerika en Groot-Brittanje in. "If U Seek Amy" is ook in Maart as die derde enkelsnit van "Circus" af, vrygestel. Die liedjie het kritiek van ouers ontvang a.g.v. sy inhoud. Die liedjie het ten spyte daarvan nog steeds sukses ervaar. Spears het 'n musiekvideo vir die liedjie verfilm waarin sy een van die nuuslesers wat haar liedjie gekritiseer het, spot.

Britney het 'n paar toere al gehad. Haar laaste wêreldtoer was die "Onyx Hotel" Toer wat egter kort geknip was na haar been besering tydens die maak van die "Outragous" musiek video. Tydens 2007 het sy 'n klein landwye toer gehad waarin sy sommige van haar ou liedjies gesing het. Hier volg 'n volle lys van haar toere:

1999: "Hair Zone Mall" Toer
2000: "...Baby One More Time" Toer
2000: "Crazy 2K" Toer
2000: "Oops!...I Did It Again" Toer
2001 - 2002: "Dream Within A Dream" Toer
2004: Die Onyx Hotel Toer
2007: Die M+M's Toer
2009: "The Circus: Starring Britney Spears" Toer
2011 "Femme Fatale" Toer

Sy is ook bekend vir haar produkte. Sy het tussen 1999 en 2002 poppe vrygestel wat 'n groot sukses was, maar verkope het gedaal soos haar beeld meer volwasse geraak het. Dit was die rede vir die einde van haar poppe-reeks. Sy het videospeletjies vrygestel en dvd's van haar wêreldtoere. Haar grootste sukses is seker haar parfuums wat sy in 2004 begin vervaardig het met die hulp van skoonheidshuis Elizabeth Arden. Haar parfuums sluit in: "Curious, Fantasy, Curious: In Control, Midnight Fantasy, Believe, Curious Heart" en "Hidden Fantasy." Sy is aangewys as die mees suksesvolle parfuumverkoper en -bemarker van alle tye.

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.