Brandwag

Brandwag (ook soms Brandwacht) is 'n nedersetting in die gebied van die Mosselbaai Plaaslike Munisipaliteit. Dit is geleë aan die R328-pad wat Hartenbos via Ruiterbos en die Robinsonpas met Oudtshoorn verbind. Brandwag is net noord van Hartenbos en net wes van die Geelbeksvlei.

Brandwag
Dorp
Brandwag
Koördinate: 34°4′0″S 22°4′0″O
Land	Suid-Afrika
Provinsie	Wes-Kaap
Distriksmunisipaliteit	Tuinroete
Plaaslike Munisipaliteit	Mosselbaai
Oppervlak
• Totaal	1,05 km2 (0,41 vk. myl)
Bevolking
• Totaal	1 470
• Digtheid	1 400/km2 (4 000/vk. myl)
Tydsone	UTC+2 (SAST)
Poskode	—

In 1817 is aan A.G. van Kervel, die eerste landdros van George, hier 'n leningsplaas van slegs 209 vierkante roede (21 hektaar) toegeken. Mettertyd het dit tot 'n klein dorpie ontwikkel. In sy fleur het die gehug beskik oor 'n skool, weeshuis, winkel en poskantoor. Tans is daar in die dorpskern slegs enkele woonhuise en die kerkgebou en saal van die NG gemeente Brandwacht.

In 1871 is daar begin met 'n wolwassery weens die onuitputlike bron van sagte water uit die Brandwagrivier. Wol uit Brandwag het hoë pryse in Londen behaal. Later jare is die was van wol na Groot-Brakrivier oorgeplaas.

Tydens die Tweede Vryheidsoorlog het daar op 9 September 1901 'n skermutseling tussen Boere- en Britse magte hier plaasgevind. 'n Burger met die van Rhode het gesneuwel en lê in die plaaslike kerkhof begrawe.