Botteniga

Die Botteniga is 'n rivier in die Noordoos-Italiaanse provinsie Treviso wat net noord van Treviso naby San Pelaio uit sogenaamde risorgive, 'n soort Karstbronne, ontspring en in Treviso in die Sile uitmond. Die rivier ontvang in sy boloop water uit die La Cerca-kanaal, die Pegorile en die Piavesella di Nervesa voordat dit naby die stadsmuur van Treviso, digby die brug Ponte de Pria, in meerdere takriviere en kanale verdeel:

  • die Cagnan Grande[1] of Pescheria-kanaal,
  • die Cagnan Medio of Buranelli-kanaal (743 m, genoem na vishandelaars van die eiland Burano naby Venesië),
  • die Cagnan della Roggia of Siletto-kanaal (1 117 m),
  • Convertite-kanaal (ook Santa Sofia-kanaal genoem, 882 m, grotendeels ondergronds), en
  • 'n kanaal aan die stadsmuur se oostekant.
Botteniga
Die Buranelli-kanaal in die historiese middestad van Treviso
Die Buranelli-kanaal in die historiese middestad van Treviso
Die Buranelli-kanaal in die historiese middestad van Treviso
Oorsprong Naby San Pelaio (TV)
Monding Sile in Treviso
Stroomgebied Veneto, Italië
Lengte 1,94 km (met Cagnan Grande)

Die gesofistikeerde stelsel van kanale en waterlope dateer uit die 16de eeu en is deur Giovanni Gioconda as deel van Treviso se versterkings beplan en gebou. Alle kanale en waterlope mond in die Sile uit.

Water uit die Botteniga voed ook 'n Karstbron binne die stadsmuur van Treviso se Centro storico waaruit die Cantarane-kanaal ontspring. Sy loop van 447 m is tans grotendeels ondergronds.[2]

Verwysings
  1. Cagnan of cagnàn (meervoud: cagnani) is 'n ou benaming van onsekere etimologiese oorsprong. Moontlik is dit 'n alternatiewe vorm van canal.
  2. Raffaele Folliero: Ri...scoprire Treviso. Guida completa per amarla e gustarla. 2o Edizione Febbraio 2017. Treviso: Editoriale Programma 2017, bl. 37
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.