Bomvanaland

Bomvanaland is 'n historiese naam vir die landstreek tussen die M'basherivier, die Mthatharivier en die see in die Transkei, Oos-Kaap. Die grootste dorp in die gebied is Elliotdale en aan die kus is die bekende oorde Koffiebaai en Gat-in-die-muur (Hole in the Wall). Die area is vernoem na die Bomvanastam wat vroeg in die 19de eeu uit Pondoland verdryf is en noord van die M'bashe gaan woon het. Tydens die Kaapse grensoorloë was die Bomvanas te swak om hulle teen die Galekas te verdedig en het die Britse owerheid om hulp genader. In Februarie 1878 is die hele kontrei aan die Kaapkolonie oorgegee en in Desember 1878 ingelyf by Tembuland as die distrik Elliotdale. Elliotdale is na die stigting van die destydse Republiek Transkei herdoop tot Xhora.