Bindingsenergie

In die skeikunde verwys die term bindingsenergie na die sterkte van 'n binding, en dit is gelyk aan die hoeveelheid energie wat vrygestel word wanneer twee of meer atome chemies bind om 'n molekuul te vorm. Bindingsenergie is ook die hoeveelheid energie wat nodig is om die chemiese binding tussen twee of meer atome in 'n molekuul te breek. Bindingsenergie word gemeet in kilojoule per mol (kJ·mol^-1). Om die kovalente binding tussen byvoorbeeld twee waterstofatome in 'n waterstofmolekuul te breek, word 436 kJ·mol^-1 energie benodig. Wanneer die H-H binding gevorm word, word 436 kJ·mol^-1 vrygestel. Meer energie word vrygestel wanneer 'n sterk chemiese binding gevorm word as wanneer 'n swakker chemiese binding gevorm word.