Bate

Bates kan enigiets wees wat aan die volgende voldoen:

• Dit is iets waaroor die entiteit beheer het
• Dit kan gebruik word om ekonomiese voordele te bekom

Bates kan tasbaar of ontasbaar wees. Voorbeelde van tasbare bates sluit in kontant, motorvoetuie, voorraad ens. Voorbeelde van ontasbare bates sluit in klandisiewaarde, patente ens.

Bates word tipies verdeel in bedryfsbates en nie-bedryfsbates.

• Bedryfsbates is enige bates wat binne 'n tydperk van minder as een jaar in kontant omgeskakel behoort te word deur die normale loop van besigheid. Hierdie tipe bates sluit items soos kontant, debiteure en voorraad in.
• Nie-bedryfsbates is enige bate wat normaalweg meer as een jaar sal neem om in kontant om te skakel. Dit sluit items soos vaste bates, ontasbare bates en lenings ontvangbaar in.
• Sommige bates kan 'n bedryfs- en nie-bedryfskomponent hê soos byvoorbeeld 'n lening toegestaan wat betaal word in maandelikse paaiemente oor die volgende 5 jaar. In die geval is die kapitaalgedeelte van hierdie lening wat ontvang sal word binne die volgende jaar 'n bedryfsbate, maar die oorblywende kapitaal 'n nie-bedryfsbate