Bandar Abbas

Bandar Abbas (Farsi: بندرعباس) of Bandar-e ‘Abbās (Farsi: بندر عباس), gebruiklike geromaniseerde spellings: Bandar ‘Abbās, Bandar ‘Abbāsī en Bandar-e ‘Abbās; deur Portugese seevaarders en handelaars vroeër ook Cambarão en Porto Comorão, deur Engelse handelaars Gamrun en deur Nederlandse handelaars Gumrun genoem, is die administratiewe hoofstad van die Suid-Iranse provinsie Hormozgan en 'n belangrike seehawe aan die Persiese Golf met 'n bevolking van 426 323 in 2012.

Bandar Abbas aan die Straat van Hormuz

Bandar Abbas بندرعباس
Kaart	Wapen
	Vlag
Land	Iran
Provinsie	Hormozgan
Koördinate	27°56′N 56°16′O
Stigting	1623
Oppervlakte:
- Totaal	-
Hoogte bo seevlak	9 m
Bevolking:
- Stadsgebied (2012)	426 323
- Bevolkingsdigtheid	-
Tydsone	IRST / UTC +3:30
- Somertyd	IRDT / UTC +4:30
Poskode	79177
Amptelike webwerf	bandarabbas.ir

Die stad is genoem na sjah Abbas I die Grote, 'n heerser uit die Safawiede-dinastie, wat die seehawe in 1623 ná sy oorwinning in 'n seeslag teen die Portugese gestig het. Tussen 1793 en 1868 is die hawe deur Oman gepag. Nog in 1955 was Bandar Abbas maar 'n klein vissersdorp met 17 000 inwoners, en eers daarna is planne ontwikkel om die nedersetting tot 'n groot handelshawe uit te bou.

Danksy sy strategiese ligging in die middel van die Straat van Hormuz, wat die Persiese Golf met die Golf van Oman verbind, dien die hawe as hoofbasis van die Iranse vloot. Gedurende die Irakees-Iranse Oorlog tussen 1980 en 1988 is Bandar Abbas as Iran se belangrikste handelshawe ontwikkel nadat Khorramshahr, 'n hawestad in die noordelike Persiese Golf, deur Irakese magte ingeneem is. Sedert die 1990's hanteer die hawe van Bandar Abbas sowat driekwart van alle Iranse invoere via die Persiese Golf. Naas hawegeriewe vir internasionale vragskepe is daar ook dokke vir die plaaslike visserybedryf en 'n groot skeepswerf wat skepe bou en herstel.

Bandar Abbas se belangrikste nywerhede is tekstielvervaardiging, visverwerkingsaanlegte, ruolieraffinaderye, aluminium- en staalvervaardiging. Belangrike uitvoerprodukte is chroom, rooi oksied, sout en swawel. Die eiland Hengam naby Bandar Abbas word deur 'n uitgestrekte gasveld omring, terwyl 'n ander eiland, Qeshm, as vryhandelsone ontwikkel is.

Bandar Abbas word deur 'n moderne pad- en spoorwegnetwerk met ander Iranse stede verbind, terwyl die plaaslike lughawe vir geskeduleerde vlugte na Iranse metropole, waaronder Teheran, en bestemmings in ander Persiese Golflande gebruik word. Bandar Abbas is vandag 'n moderne stad en administratiewe sentrum met min toeriste-aantreklikhede, behalwe vir sy basaar wat groot skare kopers lok. 'n Aantal ou moskees, heiligdomme en begraafplase is op Qeshm-eiland geleë.