Bali

Bali (Indonesies: Pulau Bali) is die westelikste en vyfde grootste van die Klein-Soenda-eilande (na Timor, Soembawa, Flores en Soemba) en is in die suide van die eilandnasie Indonesië geleë. Die eiland word begrens deur die Balisee in die noorde en die oop Indiese Oseaan in die suide. Bali is ook 'n provinsie van Indonesië op sy eie en die hoofstad sedert 1958 is Denpasar, die grootste stad van die Klein-Soenda-eilande; voorheen het Singaraja as hoofstad van Bali gedien. Bali is veral as 'n toeristebestemming bekend.

Nasa-Satellietbeeld van Bali
Kaart van Bali
Rysvelde op Bali
Bali
Inheemse naam: Pulau Bali
Topografiese kaart van Bali
Topografiese kaart van Bali
Geografie
LiggingSuidoos-Asië
Koördinate8°22′S 115°08′O
ArgipelKlein-Soenda-eilande

Oppervlakte5 780,06 vk km
Hoogste puntBerg Agung 3 031 m
Administrasie
Vlag van Indonesië Indonesië
Provinsie Bali

HoofstadDenpasar
Grootste stadDenpasar (788 445)

Demografie
Bevolking3 891 428
BevolkingsgroepeBalinese (90%), Javane (7%), Baliaga (1%), Madurese (1%)[1]

Bali is in die ooste van Java en in die weste van Lombok geleë. In die noorde, oorkant die Balisee, lê Borneo, en verder noordoos Soelawesi. Bali het 'n bevolking van 3 891 428 in 2010 gehad en beslaan 'n oppervlakte van 5 780,06 km².

Bali se geologie word gekenmerk deur baie aktiewe vulkane wat dié eiland van wes na oos gevorm het. Bali se vulkane behoort tot die Ring van Vuur wat die Stille Oseaan van Nieu-Seeland tot Chili omsirkel.

Hindoeïsme is die dominante godsdiens in Bali (83,5%), gevolg deur Moslems (13,4%), Christene (2,5%) en Boeddhiste (0,5%).[2] Die inheemse taal van Bali is Balinees, wat oor sy eie skrif beskik.

Die Balinese kat is na die Balinese dansers genoem, maar nie van Bali of Indonesië afkomstig nie.

Terreuraanvalle
  • 12 Oktober 2002: 'n Reeks motorbomme ontplof in Kuta (Denpasar) met die gevolg dat 202 mense sterf en 'n verdere 209 beseer word.

Verwysings
  1. (en) Suryadinata, Leo; Arifin, Evi Nurvidya and Ananta, Aris (2003). Indonesia's Population: Ethnicity and Religion in a Changing Political Landscape. Institute of Southeast Asian Studies. ISBN 9812302123.{{cite book}}: AS1-onderhoud: meer as een naam (link)
  2. (id) Penduduk Menurut Wilayah dan Agama yang Dianut (2010 Census). bps.go.id

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.