Augrabies- Nasionale Park

Die Augrabies- Nasionale Park is 'n nasionale park wat ongeveer 120 km wes van Upington in die Noord-Kaap van Suid-Afrika geleë is. Die park is op 5 Augustus 1966 gestig. Dit is ongeveer 820 km² groot en lê sowel noord as suid van die Oranjerivier. Besienswaardighede sluit in die Augrabieswaterval, interessante rotsformasies en granietkoepels, asook 'n verskeidenheid plante en dierelewe. Daar is verskeie staproetes in die park.[1] Die park word met die N14-nasionale pad verbind deur die R359-streeksroete.

Augrabies- Nasionale Park
Die Augrabieswaterval
Land	Suid-Afrika
Provinsie	Noord-Kaap
Naaste dorp	Upington
Augrabies- Nasionale Park
Koördinate: 28°35′28″S 20°20′18″O
Oppervlak	820 km2
Openingsjaar	5 Augustus 1966
Bestuursliggaam	SANParke
Webblad	Augrabies- Nasionale Park

Die Augrabieswaterval in die park is ongeveer 60 meter hoog en is veral aanskoulik wanneer die rivier in vloed is. Die kloof onder die waterval is gemiddeld 240 m diep en is 18 km lank. Die kloof is 'n goeie voorbeeld van erosie in graniet. Die oorspronklike Boesmaninwoners het die waterval Aukoerebis gedoop, wat beteken "plek van groot geraas". Dit is van hierdie naam wat die trekboere die naam Augrabies verkry het.

Diamante is wyd aangetref langs die Oranjerivier, en daar is 'n legende dat die grootste fonds diamante in die wêreld gevind sal word in die kolkgat wat deur erosie gevorm is aan die voet van die waterval.

Die mees kenmerkende boom in die park is die reuse aalwyn (Aloe dichtoma), wat meer algemeen bekend is as die kokerboom. Die boom is perfek aangepas in die droë woestynagtige klipgebied van die Nama-Karoo, en kan die arm grond benut en buitengewone temperature weerstaan. Die boom, wat ongeveer 5 m hoog groei, word die kokerboom genoem omdat die Boesmans die sagte takke gebruik het om kokers vir hulle pyle te maak. Die boom blom in die winter en lok groot getalle voëls en selfs bobbejane met die soet nektar.

Wildlewe in die park is volop, met meer as 46 soorte soogdiere, 45 amfibiese en 186 voëlspesies wat aangetref word. Dit sluit in dassies, bobbejane, springbokke, klipspringers, swartooievaars en dwergvalke. Elande en swartrenosters is in die park hervestig.[1]

'n Doppruim staan in Augrabies se kampterrein