Attie van Wijk

Ds. Adriaan Jacobus (Attie) van Wijk (Kuilsrivier, 6 April 1912 - Stellenbosch, 30 Desember 1976) was 'n leraar in vier gemeentes van die Nederduitse Gereformeerde Kerk, skrywer van die Bybelse dagboek Uit die Beek, skriba van die Kuratorium van die Stellenbosse Kweekskool en assessor van die Kaapse Sinode van die NG Kerk. Hy was in 1960 een van net vier lede van die NG Kerk se Federale Raad wat ten gunste was van die besluite van die Cottesloe-kerkeberaad.

Ds. Attie van Wijk.

Ds. A.J. van Wijk en sy gesin. Voor: Theo en Mattie. Middel: Andrew en mev. Margaret van Wijk. Agter: Attie, Louise, Charles, Helen en Johannes.

Ds. Van Wijk kom van moeders- sowel as vaderskant uit 'n predikantegeslag. Sy moeder, Margaret Jemima (1877-1948), was die dogter van ds. Charles Murray van die NG gemeente Graaff-Reinet van 1866 tot 1904 en kleindogter van die stamvader van die Murray-familie in Suid-Afrika, ds. Andrew Murray sr., leraar van Graaff-Reinet van 1822 tot 1866. Vier van haar ooms aan moederskant het ook predikant geword, van wie die bekendste ds. Andrew Murray was, terwyl vier van haar tantes met 'n predikant getrou het, onder wie Isabella Hofmeyr, eggenote van ds. Jan Hendrik Hofmeyr, 40 jaar lank predikant van die NG gemeente Somerset-Oos. Dié egpaar het ook vyf seuns gehad wat predikant geword het. Aan vaderskant was sy oupa ds. J.H. van Wijk, predikant van Boshoff (1871-1884) en daarna die NG gemeente Murraysburg (1884-1898), genoem na ou ds. Murray. Attie van Wijk se vader, ds. A.J. van Wijk, het Uit die Beek (aanvanklik in 'n ander formaat) in 1906 begin saamstel toe hy leraar was van die NG gemeente Britstown en 40 jaar met dié taak volgehou. Van 1971 tot 1978 het ds. Attie van Wijk jr. met dié taak voortgegaan. Ds. Van Wijk sr. was in 'n stadium skriba en later moderator van die Kaapse Kerk. Attie van Wijk het ook twee ooms gehad wat predikant geword het, ds. Z.J van Wijk (leraar van Oudtshoorn en Lückhoff en van 1937 tot 1947 assistentredakteur van die Kerkbode) en ds. T.I. van Wijk (leraar van Greykerk, Excelsior, Nieu-Bethesda en Rietbron).

Attie van Wijk het 'n meestersgraad in sielkunde aan die Rhodes-universiteitskollege in Grahamstad behaal en 'n meestersgraad in die teologie op Stellenbosch. Hy is in 1940 in sy eerste gemeente, Grahamstad ontvang en bevestig. In 1946 neem hy 'n beroep aan na die NG gemeente Port Elizabeth en bly daar tot hy in 1949 na die NG gemeente Rondebosch vertrek. Ná 'n nege jaar lange bediening hier neem hy in 1959 'n beroep aan na die NG gemeente Stellenbosch, waar hy die langste van die vier gemeentes gestaan het. Op Stellenbosch was hy skriba van die Kuratorium van die Kweekskool, 'n vertroude raadgewer van teologiese studente en het hy die beursfonds vir Kweekskoolstudente opgebou. 'n Gehoorsaal in die Kweekskool is na hom genoem.

Ds. Van Wijk is op 21 Desember 1942 op Somerset-Oos in die huwelik bevestig met Jeanne Adéle Hofmeyr (20 Julie 1918 – 17 Januarie 1966), die sesde kind en vyfde dogter van ds. John Hofmeyr (oordele op 15 Desember 1943), wat hulle waarskynlik getrou het. Uit dié huwelik is vier kinders gebore: Jeanne Adéle (1945), Adriaan Jacobus (1947), Isabelle Murray (1948) en Margaret Leoné (1952). In 1967 tree hy in die huwelik met Audrey Halloran (29 Januarie 1928-). Uit die huwelik is twee kinders gebore: Charles Halloran (1968) en Gillian Murray (1970)

Ds. Van Wijk se oudste seun, ook Attie, was ook predikant en van 2000 tot sy dood in 2005 rektor van die Hugenote-kollege op Wellington.