Armene

Die Armene of Armeniërs (Armeens: հայեր, hayer [hɑˈjɛɾ]) is 'n nasie en etniese groep inheems aan Armenië en die omstrede Republiek van Nagorno-Karabach wat Armeens, 'n Indo-Europese taal, as moedertaal praat. Hulle vorm naas die Azerbeidjanners die tweede grootste inheemse etniese groep in die Kaukasus-streek en die titulêre nasie van Armenië, waar hulle sowat 98% van dié land se bevolking uitmaak.

Hierdie artikel handel oor die etniese groep. Vir die taal, sien Armeens.

Armene
Totale bevolking:	ca. 6[1][2][3][4]–8 miljoen[5][6][7][8][9][10]
Belangrike bevolkings  in:	Armenië ~3 miljoen[11]  Rusland 1,2[12]–2,9 miljoen[13]  Verenigde State 483 366[14]–1,5 miljoen[15][16][17]  Frankryk 250 000[18]–750 000[19]  Georgië (uitsluitende Abchasië) 248 929[20]  Republiek Artsach 146 573[21]  Iran 120 000[22]  Libanon 100 000[23]  Sirië 100 000[24]  Oekraïne 100 000[25]  Griekeland 80 000[26]  Argentinië 70 000  Turkye 60 000[27]  Kanada 55 740[28]  Pole 50 000[29]  Abchasië 41 864[30]
Taal:	Armeens
Geloofsoortuiging:	Hoofsaaklik Christendom: Armeens-Apostoliese Kerk • Rooms-Katolieke Kerk • Protestantisme
Verwante etniese groepe:	Ander Indo-Europese volke

Hayk, die legendariese stigter en apostel van die Armeense nasie – skildery deur Mkrtum Hovnatanian (1779–1846)

Die meeste Armene is aanhangers van die Armeens-Apostoliese Kerk, die wêreld se oudste nasionale kerk. Die Christendom het kort ná Jesus Christus se dood Armenië bereik as gevolg van die twee apostels Thaddeüs en Bartolomeüs se suksesvolle pogings.[31] In die 4de eeu het die Koninkryk van Armenië die eerste land geword wat die Christendom as 'n staatsgodsdiens aanvaar het, nog voor die destydse Romeinse Ryk.[32]

As gevolg van die Armeense volksmoord (1915–1916) in die Ottomaanse Ryk tydens die Eerste Wêreldoorlog het 'n groot Armeense diaspora in Westerse lande en die destydse Russiese Ryk gevestig.[33] Wêreldwyd leef tussen 6 en 8 miljoen Armene, waarvan meer as 3 miljoen in Armenië, tussen 1,2 en 2,9 miljoen in Rusland, tussen 483 366 en 1,5 miljoen in die Verenigde State en tussen 250 000 en 750 000 in Frankryk. Die klein Armeense gemeenskap in Suid-Afrika word op sowat 200 siele beraam.[34]