Archelaos I van Masedonië

Archelaos I (Grieks: Ἀρχέλαος Α), uit die Argeïese Dinastie, was van 413 tot 399 v.C. koning van Masedonië. Hy was die seun van Perdikkas II by ’n slavin. Hy het ná sy pa se dood sy oom, neef en halfbroer, wat toe die regmatige opvolger was, vermoor om koning te word. Hy was egter ’n goeie heerser wat groot en voordelige veranderings aangebring het aan die staatsadministrasie, weermag en handel.

Archelaos I
Koning van Masedonië
Tydperk tradisioneel: 413 v.C. – 399 v.C.
Grieks Ἀρχέλαος Α΄
Huis Argeïese Dinastie
Voorganger Perdikkas II
Opvolger Krateros
Vrou onbekend
Kinders Orestes
Archelaos II
Vader Perdikkas II
Moeder onbekend
Geloof Griekse mitologie

Bewind

Feitlik dadelik ná sy troonbestyging het hy ’n verandering teweeggebring aan die betrekkinge met Athene wat in die halfeeu vantevore baie gespanne was. Ná ’n groot nederlaag waarin feitlik al Athene se skepe verwoes is, het hulle dringend hout nodig gehad om nuwe skepe te bou. Archelaos het hulle van hout voorsien en hy en sy kinders is deur die Atheners vereer met eretitels.[1]

Archelaos het ook gesorg vir baie binnelandse hervormings. Hy het munte van goeie gehalte laat slaan, versterkings gebou, reguit paaie laat bou (wat die weermag beweegliker gemaak het) en die weermag self verbeter.

Hy het ook in kultuur belanggestel en het kulturele en kunsbande met Suid-Griekeland aangeknoop. Hy het bekende digters, skrywers, musikante en skilders in sy paleis onthaal, waaronder die digter Euripides. Hy het die Olimpië, 'n godsdiensfees met musiek- en atletiekkompetisies ter ere van die god Zeus en die Muses in Dion, Masedonië, gereorganiseer. Dit het die beste atlete en kunstenaars van Griekeland na Masedonië gelok.

Dood

Volgens Aelian is Archelaos in 399 v.C. tydens ’n jagtog dood.[2] Teen dié tyd was Masedonië ’n baie sterker mag as voor sy bewind.

Verwysings
  1. In the shadow of Olympus, deur Eugene N. Borza, bl. 163, ISBN 0-691-00880-9
  2. Aelian, Varia Historia, 8.9.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.