Apollo 12

Apollo 12 was die sesde bemande sending in die Verenigde State van Amerika se Apollo-program en die tweede wat mense laat land het op die maan. Dit is op 14 November 1969 vanaf die Kennedy Ruimtesentrum in Florida geloods, vier maande na die suksesvolle Apollo 11-maansending. Die bevelvoerder was Pete Conrad en die vlieënier van die maanmodule was Alan Bean. Hulle het albei net meer as een dag en sewe uur op die maan oppervlak verskeie aktiwiteite uitgevoer terwyl die bevelmodule met Richard F. Gordon om die maan bly wentel het. Die landingplek vir die sending was geleë in die suidooste van die "Oseaan van Storms" op die maan.

Die Apollo 12-logo bevat 'n seilskip wat om die maan wentel, met 'n vuurstert agterna. Die hele bemanning was voorheen vlootvlieëniers.

Die bemanning van Apollo 12, v.l.n.r. Conrad, Gordon en Bean.

In teenstelling met die eerste maanlanding met die "Eagle"-tuig van Apollo 11, het Conrad en Bean 'n presiese landing op hul verwagte posisie gemaak, die staanplek van Surveyor 3, 'n onbemande ruimtetuig, wat op 20 April 1967 daar geland het. Hulle het die eerste kleurtelevisiekamera na die maanoppervlak geneem, maar die uitsending is onverwags beëindig nadat Bean per ongeluk die kamera vernietig het deur dit na die son te rig. Op een van die twee uitstappies het hulle die Surveyor besoek en 'n paar onderdele verwyder vir terugname na die aarde. Die missie het op 24 November geëindig met 'n suksesvolle waterplonsing van die kapsule in die Stille Oseaan. Die bemanning is deur die USS Hornet (CV-12) opgepik.