Andriantsimitoviaminandriandehibe

Andriantsimitoviaminandriandehibe ("die adellike sonder weerga onder die groot adellikes") was van omstreeks 1650 tot 1670 koning van die Koninkryk Imerina op die plato van Madagaskar. Hy het die troon bestyg ná die dood van sy pa, koning Andriantsitakatrandriana. Hy het drie vroue gehad: Ratompoimbahoaka van Ambohimalaza, prinses Ramahafoloarivo (kleindogter van koning Andrianjaka) en prinses Rafaravavy Rampanananiamboninitany.[1]

Andriantsimitoviaminandriandehibe
Koning van Imerina
Regeer c. 1650-1670
Dinastie Hova
Voorganger Andriantsitakatrandriana
Opvolger Razakatsitakatrandriana
Gebore Rova van Antananarivo
Oorlede c. 1670, Rova van Antananarivo
Eggenotes Ratompoimbahoaka
Ramahafoloarivo
Rafaravavy Rampanananiamboninitany
Kinders Vier seuns
Drie dogters
Vader Andriantsitakatrandriana
Moeder Ravololontsimitovy

Bewind

Andriantsimitoviaminandriandehibe het hom voorgeneem om sy pa se werk voort te sit om die Bestimitatatra-moerasse met behulp van dyke in ryslande te omskep om Imerina se groeiende bevolking te voed. Die koning het die gebied in ’n noordelike en suidelike gebied verdeel met die Ikoparivier langs en het sy tweede oudste seun, Andrianjakanavalondambo, aangestel om toesig oor die bou van die suidelike dyk by Ambivy te hou, terwyl sy oudste seun en opvolger, Razakatsitakatrandriana, opdrag gekry het om die noordelike dyk van Ankadimbahovaka tot Anosizato te bou. Die twee prinse het met mekaar meegeding om te kyk wie sy dyk eerste kon voltooi. Die jonger seun het gewen.

Andrianjaka Razakatsitakatrandriana is aangewys as sy pa se opvolger en heerser van Antananarivo, Ambohidrabiby en Ambohimanga. Andrianjakanavalondambo is aangestel as regeerder van Alasora, Ambohimanjaka, Antanamalaza, Ifandana, Ambohimanambola en Andrianakotrina. Ná hul pa se dood sou Andrianjakanavalondambo sy ouer broer verdring as die gevierde monarg Andriamasinavalona.[2] Andriantsimitoviaminandriandehibe se twee jonger seuns, Andriandambomanafika en Andriamanitrinitany, was onderskeidelik medeheerser van Ambohimanga en regeerder van Ambohipoloalina.[1]

Dood

Andriantsimitoviaminandriandehibe is omstreeks 1670 in die Rova van Antananarivo oorlede. Hy is deur sy oudste seun, Andrianjaka Razakatsitakatrandriana, opgevolg.[1]

Verwysings
  1. Buyers, Christopher. "The Merina (or Hova) dynasty" (in Portugees). Geargiveer vanaf die oorspronklike op 29 April 2020. Besoek op 9 Oktober 2010.
  2. Callet, François (1972) [1908]. Tantara ny andriana eto Madagasikara (histoire des rois) (in Frans). Antananarivo: Imprimerie catholique., p. 533

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.