Ametrien

Ametrien, ook bekend as tristien of onder sy handelsnaam bolivianiet, is 'n natuurlike variëteit van kwarts. Dit is 'n mengsel van ametis en sitrien, met sones van pers en geel of oranje. Byna alle kommersiële beskikbare ametrien word in Boliwië ontgin.

Geslypte ametrien
Die kwarts variëteit ametrien.

Die kleur van die sones wat binne ametrien sigbaar is, is te danke aan verskillende oksidasietoestande van yster in die kristal. Die verskillende oksidasietoestande ontstaan as gevolg van 'n temperatuurgradiënt oor die kristal tydens die vorming daarvan.

Kunsmatige ametrien kan geskep word deur differensiële hittebehandeling van ametiste.

Volgens legende is ametrien die eerste keer aan Europa bekendgestel deur 'n conquistador se geskenke aan die Spaanse koningin, nadat hy 'n myn in Boliwië as 'n trougeskenk ontvang het ná sy huwelik met 'n prinses van die Ayores-stam.[1]

Daar kan aanvaar word dat die meeste ametrien in die laer pryssegment van sintetiese materiaal afkomstig is. 'n Russiese laboratorium het sedert 1994 die industriële produksie van tweekleurige kwarts vervolmaak, wat later bestraal word om die tipiese ametrienkleure tot voorskyn te bring. Groen-geel of goudkleurige-blou ametrien kom nie in die natuur voor nie.

Verwysings
  1. Vasconcelos, Paolo; Wenk, Hanz-Rudolf; Rossman, George. "The Anahí Ametrine Mine, Bolivia," Gems and Gemology, Spring 1994, p. 4-23

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.