Ali Asadov

Ali Asadov is op 30 November 1956 in Bakoe gebore. In 1974 voltooi hy sy skoolloopbaan by die sekondêre skool in Bakoe en skryf in by die Plekhanov Russiese Universiteit vir Ekonomie in Moskou, waar hy gradueer in 1978. Van 1978 tot 1980 het hy in die weermag gedien.

In 1980 begin hy werk as hoof- laboratoriumassistent by die Instituut van Ekonomie aan die Akademie van Wetenskap van die Aserbeidjanse SSR.

Asadov het sy studies voortgesit aan die Instituut van Ekonomie aan die Russiese Akademie vir Wetenskap in Moskou tussen 1981 en 1984, waar hy sy nagraadse diploma in Ekonomie voltooi.

Tussen 1989 en 1995 werk Ali Asadov as mede-professor en hoof van die Departement aan die Bakoe Instituut van Maatskaplike Bestuur en Politieke Wetenskap, voordat hy die politiek betree.

In die eerste Aserbeidjanse parlementêre verkiesing op 12 November 1995 word hy verkies as verteenwoordiger van die Nuwe Aserbeidjanse Party vir die tydperk 1995 tot 2000 as 'n lid van die Nasionale Vergadering van die Republiek van Azerbeidjan.

Op 17 April 1998 word hy aangestel as die Assistent van die President van Azerbeidjan vir Ekonomiese Sake.

Volgens 'n besluit deur President İlham Aliyev op 30 November 2012 is Ali Asadov aangestel as die Adjunkhoof van Presidensiële Administrasie en in 2017 as Ekonomiese Raadgewer van die President van Azerbeidjan.

Asadov word as 'n bondgenoot van President Aliyev beskou. In Oktober 2019, na die bedanking van Novruz Mammadov, word Asadov in die Nasionale Vergadering verkies tot Eerste Minister van Azerbeidjan met 105 stemme teen 0.

• Wikimedia Commons het meer media in die kategorie Ali Asadov.