Alfred Kinsey

Alfred Charles Kinsey (23 Junie 1894 – 25 Augustus 1956) was ’n Amerikaanse bioloog, ’n professor in entomologie en soölogie, en ’n seksuoloog wat in 1947 die Instituut vir Seksnavoring aan die Indiana-universiteit gestig het;[1] dit is nou bekend as die Kinsey-instituut vir Navorsing in Seks, Gender en Voortplanting. Hy is veral bekend vir die skryf van Sexual Behavior in the Human Male (1948) en Sexual Behavior in the Human Female (1953), ook bekend as die Kinsey-verslae, sowel as vir die Kinsey-skaal. Kinsey se navorsing oor menslike seksualiteit, wat tot die veld seksuologie gelei het, was in die 1940's en 1950's baie omstrede. Sy werk het sosiale en kulturele waardes in die VSA én wêreldwyd beïnvloed.

Alfred Kinsey
Kinsey in Frankfurt, November 1955.
Geboortenaam Alfred Charles Kinsey
Gebore (1894-06-23)23 Junie 1894
Hoboken, New Jersey, VSA
Oorlede 25 Augustus 1956 (op 62)
Bloomington, Indiana, VSA
Nasionaliteit Amerikaans
Vakgebied Biologie
Instelling(s) Indiana-universiteit
Alma mater Bowdoin-kollege
Harvard-universiteit
Bekend vir Seksuologie en menslike seksualiteit: Kinsey-verslae, Kinsey-skaal

Seksuologie

Kinsey word algemeen beskou as die eerste belangrike figuur in Amerikaanse seksuologie; sy navorsing het gelei tot ’n groter verkenning van seksualiteit onder ander seksuoloë en die publiek, sowel as die bevryding van vroue as seksuele wesens.[2][3] Kinsey se werk het twyfel gewerp op die idee dat vroue in die algemeen nie seksueel is nie en dat ’n vaginale orgasme beter as ’n klitorale orgasme is.[2][3] Hy het in 1933 aanvanklik geïnteresseerd geraak in verskillende vorme sekspraktyke nadat hy die onderwerp in diepte met ’n kollega, Robert Kroc, bespreek het. Kinsey het die variasies in paringspraktyke onder galwespe bestudeer. In dié tyd het hy ’n skaal ontwerp wat seksuele oriëntasie meet wat nou bekend is as die Kinsey-skaal. Dit strek van 0 tot 6, waar 0 uitsluitlik heteroseksueel en 6 uitsluitlik homoseksueel is; X is later bygevoeg vir "geen sosioseksuele kontakte of reaksies".

In 1935 het hy die onderwerp die eerste keer in die openbaar bespreek. Hy het die "wydverspreide onkunde oor seksuele struktuur en fisiologie" aangeval en sy mening gegee dat "uitgestelde huwelike" (dus uitgestelde seksuele ondervinding) psigologies skadelik is. Hy het navorsingsgeld van die Rockefeller-stigting gekry wat hom in staat gestel het om menslike seksuele gedrag verder te bestudeer.[4] Hy het Sexual Behavior in the Human Male in 1948 gepubliseer, gevolg deur Sexual Behavior in the Human Female in 1953. Albei was boaan die topverkoperlys en het Kinsey beroemd gemaak. Hierdie publikasies het later bekend geword as die Kinsey-verslae. Artikels oor hom het in tydskrifte soos Time, Life en Look verskyn.

Die Kinsey-verslae, wat ’n storm van omstredenheid veroorsaak het, word deur baie beskou as die voorloper van die seksuele revolusie van die 1960's en 1970's.

Verwysings
  1. "Learn our history". The Kinsey Institute (in Engels). Geargiveer vanaf die oorspronklike op 25 April 2020. Besoek op 1 Julie 2017.
  2. Irvine, Janice M. (2005). Disorders of Desire: Sexuality and Gender in Modern American Sexology. Temple University Press. pp. 37–43. ISBN 978-1592131518.
  3. Charles Zastrow (2007). Introduction to Social Work and Social Welfare: Empowering People. Cengage Learning. pp. 227–228. ISBN 0495095109.
  4. Jones, James H. Alfred C. Kinsey: A Life WW Norton New York, New York pages 441–445

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.