Alexander Albon

Albon jaag in 'n Toro Rosso tydens die 2019 Oostenrykse Grand Prix

Op 26 November 2018 is aangekondig dat Albon van sy Nissan e.dams Formule E-kontrak vrygestel is ná gerugte dat hy vir Scuderia Toro Rosso in Formule Een sou teken. Op dieselfde dag het Toro Rosso aangekondig dat Albon vir 2019 saam met Daniil Kvyat by die span sal aansluit en dus is Albon se verhouding met Red Bull, wat sewe jaar tevore beëindig is, herstel. Hy is die tweede Thaise jaer wat aan Formule Een deelneem[8] en die eerste sedert Prins Bira wat in 1954 deelgeneem het.[9]

Albon het veertiende geëindig in sy debuutren, die 2019 Australiese Grand Prix. Hy het sy eerste punte by die volgende wedren, die Bahreinse Grand Prix, aangeteken, en negende geëindig.

Albon se beste kwalifiserende resultaat met Toro Rosso was by die Britse Grand Prix met 'n negende plek, hoewel hy nie daarin kon slaag om punte in die wedren aan te teken nie. Albon het die Duitse Grand Prix in die sestiende plek weggespring. Hy en Toro Rosso het voordeel getrek uit veranderende weersomstandighede om so hoog as vierde te vorder en uiteindelik sesde te eindig, al was dit agter spanmaat Kvyat wat die span se eerste podiumplek in meer as tien jaar behaal het.

Albon ry vir Red Bull by die 2019 Italiaanse Grand Prix.

Ná die Hongaarse Grand Prix het Red Bull Racing aangekondig dat Albon vir Pierre Gasly by die span sou vervang vanaf die Belgiese Grand Prix, wie sou terugkeer na Toro Rosso. Oor die middelseisoenverandering het Red Bull gesê: "Die span sal die volgende nege wedrenne gebruik om Alex se prestasie te evalueer om 'n ingeligte besluit te neem oor wie in 2020 saam met Max sal ry."[10][11]

Albon het sy debuutseisoen agtste in die Wêreldjaerskampioenskap met 92 punte afgesluit. Hy het die nuweling van die jaar-toekenning by die FIA-prysuitdeling ontvang.

Albon ry vir Red Bull in Barcelona in 2020 gedurende voorseisoentoetse

Albon het in 2020 voortgegaan om vir Red Bull saam met spanmaat Verstappen te jaag.[12] In die slotfase van die Oostenrykse Grand Prix, was Albon in die derde plek na die veiligheidsmotor op nuwe sagte bande, agter die voorste Mercedes-motors op ouer harde bande. Albon het probeer om Lewis Hamilton verby te steek, maar die twee het kontak gemaak en Albon in die gruis ingestuur. Albon het later onttrek met 'n elektriese fout wat enjinverskaffer Honda gesê het agv die botsing was.[13][14]

Albon jaag by die 2020 Toskaanse Grand Prix, waar hy sy debuut-podiumplek behaal het.

Hy het onder druk gekom van Racing Point se Sergio Pérez in die laaste rondtes van die Stiermarkse Grand Prix, maar het die vierde plek behou nadat die jaers kontak gemaak het, wat Pérez se voorvleuel beskadig het.[15] Red Bull het opgemerk dat hulle onseker is waarom Albon nie genoeg spoed in die wedloop het nie.[16] Hy het dertiende begin en tot vyfde verbeter by die Hongaarse Grand Prix.[17]

Albon het swaar gebots tydens oefeninge vir die 2020 Britse Grand Prix en het maar twaalfde gekwalifiseer. Hy is in die wedren gestraf omdat hy 'n botsing met Kevin Magnussen veroorsaak het en het teruggeval in die veld voordat hy uiteindelik agtste geëindig het. Hy het vyfde gekwalifiseer vir die 2020 Belgiese Grand Prix maar het sesde geëindig nadat hy in die laaste rondte deur Renault se Esteban Ocon verbygesteek is.[18] Albon het sy eerste Formule Een-podium by die 2020 Toskaanse Grand Prix behaal deur Daniel Ricciardo in die sluitingsrondtes verby te steek, die eerste podium vir 'n Thaise Formule Een-jaer.[19]

Albon is afgegradeer tot die rol van toets- en reserwejaer by Red Bull vir 2021, en sy renplek is deur Sergio Pérez ingeneem.[20] Na sy afgradering het Albon opgemerk dat "dit seer maak", maar bygevoeg dat hy hoop om terug te keer na 'n wedrenplek vir 2022.[21] Nadat hy sy 2021 DTM-veldtog voltooi het, het hy vanaf die 2021 Turkse Grand Prix 'n afrigtingsrol vir die AlphaTauri-jaer Yuki Tsunoda ingeneem.[22][23][24]

Albon het in 2022 na Formule Een teruggekeer by Williams, en George Russell vervang as spanmaat van Nicholas Latifi[25] Nadat die aankondiging gemaak is, het Red Bull-spanhoof, Christian Horner, onthul dat Albon "'n skakel na Red Bull behou" en dat die span 'n opsie het om hom vir 2023 te herroep.[26]