Afrikaanse oewerswael
Die Afrikaanse oewerswael is, soos sy naam aandui, deel van die swaelfamilie. Hy verskil egter van ander swaels met sy bruin rug, klein grootte en vinniger, rukkerige vlug. Die oewerswael is die naaste verwant aan die Europese oewerswael (Riparia riparia).
| Afrikaanse oewerswael | |
|---|---|
_-_Flickr_-_Lip_Kee_(1).jpg.webp) | |
| Wetenskaplike klassifikasie | |
| Domein: | |
| Koninkryk: | |
| Filum: | |
| Klas: | |
| Orde: | |
| Familie: | |
| Genus: | Riparia |
| Spesie: | R. paludicola |
| Binomiale naam | |
| Riparia paludicola (Vieillot, 1817) | |
Identifikasie
Die Afrikaanse oewerswael is 12 cm lank en is bruin aan die bo-kant en wit of ligbruin aan die onderkant. Hy het nie dieselfde bruin streep oor sy bors as die Europese oewerswael nie. Oewerswaels het swart snawels en bruin bene. Mannetjies en wyfies is eenders in voorkoms, maar jonger voëls se vere is ligter van kleur op die vlerke en agterkant.
Habitat
Afrikaanse oewerswaels bou hulle neste in kolonies en baie paartjies sal naby mekaar broei as die ruimte dit toelaat. Hulle neste word aan die einde van 30–60 cm lange tonnels gebou, wat die voëls self in sandbanke boor. Die nes self is 'n versameling strooi en vere aan die einde van die tonnel. Hulle word in laagliggende gebiede aangetref, verkieslik naby water en ook moerasagtige gebiede.
Voortplanting
Die wyfie lê gewoonlik twee tot vier wit eiers. Die mannetjie en wyfie neem beurte om die eiers uit te broei.
Dieet
Die kos van hierdie spesie bestaan uit klein insekte: meestal muggies en ander vlieënde insekte wat in hulle vroeë fases in of naby die water woon.
Verspreiding
Afrikaanse oewerswaels is wyd oor Afrika verspreid, asook Indië en ander dele van Suid-Asië. Dit is 'n gedeeltelike migrerende spesies en sommige bevolkings sal met die seisoene migreer.
Geluid
Die kwetterende sang van die Afrikaanse oewerswael is aanhoudend tydens vlug, maar neem 'n gesels-trant aan wanneer hulle land. Daar is ook 'n skerp alarm-roep.
Subspesies
Daar is sewe subspesies wat volgens grootte en die kleurskakerings van die bo- en onderdele onderskei word:
- R. p. paludicola, Suidelike Afrika. Wit onderdele.
- R. p. paludibula, Westelike Afrika. Kleiner en donkerder as die benoemde spesie (R. p. paludicola).
- R. p. ducis, Oostelike Afrika. Kleiner en donkerder as die benoemde spesie (R. p. paludicola).
- R. p. mauretanica, Marokko. Klein en lig van kleur.
- R. p. newtoni, slegs in die bergargtige gebiede van Kameroen. Donkerder as die benoemde spesie met bruinerige onderdele.
- R. p.cowani, Madagaskar. Klein met gryserige onderdele.
- R. p. chinensis, Suidelike Asië. Die onderdele en keel is lig van kleur.
Ander name
- Wetenskaplike naam: Riparia paludicola
- Engelse naam: Brown-throated (Sand) Martin
Sien ook
Bronnelys
- Turner, Angela K; Rose, Chris (1989). Swallows & martins : an identification guide and handbook. Houghton Mifflin. ISBN 0-395-51174-7.