Aspergillus flavus

Aspergillus flavus is 'n swam wat soms op landbouprodukte soos grondboontjies voorkom en die toksien aflatoksien veroorsaak. Die toksien is gevaarlik vir jong diere wanneer hulle dit saam met veevoer inkry. Diere wat besmette voedsel gevoer word, kan toksien in eiers, melkprodukte en vleis oordra. Mense kan ook direk blootgestel word deur, onder andere, grondboontjiebotter. Kinders is veral kwesbaar vir blootstelling aan aflatoksien, wat geassosieer word met verswakte immuniteit, vertraagde ontwikkeling, en lewerkanker.

'n Konidiofoor van A. flavus.

Volwassenes het 'n hoër weerstand teen aflatoksien, maar is ook in gevaar om aangetas te word. Daar word van geen diersoort geweet wat immuun is nie. Aflatoksien word beskou as een van die mees kankerwekkende stowwe wat bekend is. Dit kan moontlik lewerkanker veroorsaak.

In 2024 herroep die Suid-Afrikaanse Nasionale Verbruikerskommissie verskeie grondboontjiebotter handelsmerke weens moontlike besmetting met aflatoksien.

Beheer

Om te verseker dat grane en peulgewasse vry bly van Aspergillus flavus- infeksie, moet sekere toestande voor, tydens en na die oesproses verseker word. Vogvlakke moet onder 11,5% gehou word. Temperatuur in stoorkamers moet so laag as moontlik gehou word aangesien die patogeen nie onder 5 °C kan groei nie. Laer temperature voorkom vogtoename. Insekte en myte help die vinnige groei van die patogeen aan en moet beheer word. Die verwydering van ou en groen sade, beskadigde en gebreekte sade, en algehele netheid help om die kolonisasie en verspreiding van die patogeen te verminder.[1]

Sien ook

Bron
  • DOKTER in die huis. Dr. Jan van Elfen, Tafelberg-Uitgewers, 1993, ISBN 0 624 03234 5

Verwysings
  1. Agrios, George N. (2005). Plant Pathology: Fifth Edition. Elsevier Academic Press. p. 922. ISBN 978-0-12-044565-3.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.