Kameeldoring

Die kameeldoring (Vachellia erioloba (E.Mey.) P.J.H.Hurter) is 'n boom in die peulplantfamilie (Fabaceae). Die kameeldoring kom in Angola, Botswana, Namibië, Zambië en Zimbabwe voor en in Suid-Afrika in Gauteng, Limpopo, Mpumalanga, Noord-Kaap en Noordwes voor. Die spesies is van die belangrikste bome in woestyngebiede. Die spesie varieer in grootte, van klein doringstruike tot groot bome.

Kameeldoring
Kameeldoring (Vachellia erioloba)
Sade en peule
Wetenskaplike klassifikasie edit
Domein: Eukaryota
Koninkryk: Plantae
Klade: Tracheofiete
Klade: Angiospermae
Klade: Eudicots
Klade: Rosids
Orde: Fabales
Familie: Fabaceae
Klade: Mimosoideae
Genus: Vachellia
Spesie:
V. erioloba
Binomiale naam
Vachellia erioloba
(E.Mey.) P.J.H.Hurter, (2008)
Sinonieme
  • Acacia erioloba E.Mey.
  • Acacia giraffae Willd.
  • Mimosa giraffae Poir.

Daar is 'n woud van kameeldoringbome digby die dorp Kathu in die Noord-Kaap wat in 1995 tot natuurerfenisgebied verklaar is.

Die boom se FSA-nommer is 168.[1]

Naam

Die Afrikaanse naam, kameeldoring verwys na kameelperde wat algemeen aan die hoë blare wat buite die bereik van kleiner diere is vreet.

Die naam Acacia erioloba is uit Grieks afgelei: akis wat "punt" of "doring" beteken, erio beteken "wollerig", met verwysing na die buitekant van die vrug, en loba beteken "lob", met verwysing na die vrug.

Beskrywing

Die kameeldoring is 'n immergroen tot halfbladwisselende boom wat tot 20 meter hoog word, met 'n wydgestrekte kroon. Die jong takke is in 'n opvallende sigsagpatroon.

Die bas van jong takkies is glad en rooibruin, maar is bruin tot grys en diep gegroef by ouer takke en stamme. Dorings is in pare, byna reguit, tot 60 mm lank, gewoonlik dik en vergroei by die basis tot 'n groot miergal. Die blare is dubbelveervormig saamgestel, met 2–5 mm in deursnee.

Bloeityd is van Julie tot September. Blomme is in 'n ronde, goudgeel, soetgeurige bloeiwyse tot 15 mm in deursnee. Vrugte word vanaf Desember tot April gevorm en is nie-oopspringend, hard, baie breed en gekrom, tot 130x70 mm bedek met grys fluweelagtige hare, sponsagtig binne.

Hout het 'n baie dun, ligkleurige spinthout en 'n donkerrooibruin, harde, swaar (lugdroog 1 144 kg/m³) kernhout.

Habitat

Droë bosveld langs rivierbeddings waar ondergrondse water beskikbaar is en op sanderige leem en diep Kalaharisand.

Gebruike

Mense, voëls en diere hou van die gom wat die boom afskei. Die binnebas word afgestroop en gestamp om sterk tou van te maak. Gebrande en verpoeierde peule word gebruik om ontsteekte ore te behandel. Die geroosterde saad kan ook as plaasvervanger vir koffie dien.

Fotogalery
  • Die peule van die kameeldoring aan 'n boom naby Potgietersrus.
    Die peule van die kameeldoring aan 'n boom naby Potgietersrus.
  • Sade op die grond in Sossusvlei, Namibwoestyn.
    Sade op die grond in Sossusvlei, Namibwoestyn.
  • Bas aan 'n boom naby Potgietersrus.
    Bas aan 'n boom naby Potgietersrus.
  • Die dorings is skep.
    Die dorings is skep.
  • Kameeldoring in die Namibwoestyn.
    Kameeldoring in die Namibwoestyn.
  • Vachellia erioloba - museumeksemplaar.
    Vachellia erioloba - museumeksemplaar.

Sien ook

Verwysings
  1. https://www.treetags.co.za/national-list-of-indigenous-trees/

Bronne

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.