Abraham Johannes Pepler

Ds. Abraham Johannes Pepler (Franschhoek, 11 Maart 1854 - 25 Februarie 1948) was 'n leraar in die Nederduitse Gereformeerde Kerk.

Ds. Abraham Pepler, 42 jaar lank leraar in die NG Kerk.

Die kerkgebou van die NG gemeente Molteno. Ds. Pepler, Molteno se tweede NG predikant, het die hoeksteen in Mei 1905 gelê.

Di. Pepler is op die ou wynplaas La Motte in die Franschhoek-vallei gebore en ontvang sy opleiding op Stellenbosch, maar onderbreek sy studie 'n tyd lank om onderwys te gee. In 1876 keer hy terug na die Eikestad en voltooi sy teologiese studie aan die Kweekskool in 1882. Sy eerste gemeente was Venterstad, waar hy op 14 Junie 1883 georden en bevestig is as die gemeente se eerste leraar.

In 1899 neem ds. Pepler 'n beroep aan na die NG gemeente Molteno, ook in die Oos-Kaap, waar hy in September daardie jaar bevestig is. Hy arbei hier 'n kwarteeu lank voordat hy sy emeritaat in 1925 aanvaar. In dié tyd het die dorp Molteno sy belangrikheid as 'n steenkool-myndorp verloor toe beter gehalte steenkool uit Transvaal en Natal die laegraadse steenkool van die Stormberge onekonomies gemaak het. Ds. Pepler se voorganger op Molteno was die gemeente se eerste leraar, ds. J.F. Marais, wat in 1899 na die Dordrecht vertrek het. Die gemeente bereik 'n groot mylpaal tydens ds. Pepler se bediening nadat die kerkraad reeds op sy vergadering van 18 Februarie 1899 besluit het om 'n nuwe kerk te bou. Die geld vir die nuwe kerk is hoofsaaklik ingewin deur middel van die tiendestelsel. In Mei 1905 lê ds. Pepler die hoeksteen en op 20 April 1906 wy die gemeente sy indrukwekkende en stewige kerkgebou in wat vandag nog bo die dorp uittroon.

Hoewel ds. Pepler baie beroepe ontvang het, het hy verkies lank in 'n gemeente te bly. Ná sy emeritaat was hy nog in 13 gemeentes behulpsaam. Die skrywer van sy lewenskets in die NG Kerk se Jaarboek van 1949 sê van hom dat hy besonder gelief was in sy gemeentes, "want hy het nie net belanggestel in die sieleheil van sy lidmate nie, maar het ook 'n hart gehad vir al hul belange. Sy bediening van 42 jaar was dan ook kennelik geseënd." Deur sy hele loopbaan het hy belanggestel in kerklike en teologiese sake en selfs in sy hoë ouderdom was hy nog lief daarvoor om oor teologiese en wetenskaplike sake te redeneer.

Ds. Pepler is in Februarie 1948 in die hoë ouderdom van 94 jaar oorlede.