Aartappelbrood

Aartappelbrood is 'n soort brood waarin koringmeel (afhangende van die resep volledig of gedeeltelik) deur aartappelmeel, aartappelvlokkies of fyngedrukte aartappels vervang word.

'n Duitse Kartoffelbrot
Potato pancakes, in Noord-Ierland dikwels ook fadge genoem, maak deel uit van die tradisionele Ulster fry of gebraaide ontbyt van Noord-Ierland. Dit mag ook as deel van 'n kontinentale ontbyt genuttig word - naas Irish soda farl of ander soorte brood. Duitse besoekers sal hierdie soort brood maklik herken as Reibekuchen

Geskiedenis

In die laat 18de eeu, toe koringmeel in Frankryk al hoe skaarser geword het, is wetenskaplike navorsing oor aartappelmeel en -stysel as alternatiewe gedoen. Die doelwit was om 'n einde te maak aan die algemene publiek se vereenselwiging van koringmeel met brood. Ook is daar pogings onderneem om jamwortels - 'n stapelvoedsel vir slawe - deur aartappelprodukte te vervang. Die geneeskundige joernaal Gazette de Santé, wat hervorming in die bakkery- en landboubedryf voorgestaan het, het gunstige kommentaar gelewer op die navorsing en eksperimente wat deur die Franse farmaseut en agronoom Antoine Parmentier (1737–1813) in hierdie verband gedoen is.

Interessant genoeg is 'n brief in die joernaal gepubliseer wat ene Gérard, 'n Franse geneeskundige aan die Kaap die Goeie Hoop in 1783 aan Parmentier geskryf het. Gérard het aan die Kaap self met aartappelmeel as alternatief tot koringmeel geëksperimenteer en blykbaar uitstekende resultate behaal: "Ek het 'n uitstekend goeie, wit, ligte, verteerbare brood verkry wat net so lank houbaar kan wees soos koringmeelbrood."[1]

Verenigde State

In Amerikaanse deelstate soos Idaho met 'n lang tradisie van aartappelverbouing en -prosessering word dikwels (ontdooide) frozen mashed potatoes (fyngedrukte aartappels as diepvrieskos), wat in supermarkte aangebied word, vir die brooddeeg van selfgemaakte aartappelbrood gebruik. Klaar gebakte aartappelbrood word in die Verenigde State op groter skaal kommersieel vervaardig en in supermarkte te koop aangebied. Dit het 'n ligte (maar ietwat dikker) tekstuur net soos witbrood, maar met 'n gelerige kleur en 'n effense aartappelgeur.

'n Ander gewilde variant is soetpatatbrood.

Verwysings
  1. E.C. Spary: Cambridge Social and Cultural Histories - Feeding France: New Sciences of Food, 1760–1815. Cambridge: Cambridge University Press 2014, bl. 73-74

Eksterne skakels
Potato pancakes (fadge) as deel van die Ulster fry
Suid-Afrikaanse resepte
Amerikaanse resepte
Scottish-Italian-Angeleno Deluxe
Taste Arkansas
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.