AGV

Die AGV ('n afkorting van die Franse Automotrice à grande vitesse) is 'n nuwe reeks Franse hoësnelheidstreine wat deur die maatskappy Alstom vervaardig en as opvolger van die TGV beskou word. Die trein is aanvanklik as 'n gemeenskaplike projek van Alstom en die Franse spoorwegmaatskappy SNCF ontwikkel, maar SNCF het sy deelname later beëindig.[1] Die nuwe trein, wat in tegniese opsig die vierde generasie van TGV-hoësnelheidstreine verteenwoordig, is uiteindelik deur Alstom teen 'n koste van sowat € 100 miljoen ontwikkel, en die eerste treine is in 2010 in bedryf gestel.

'n AGV-trein ondergaan toetse in Tsjeggië.

Die tegniese hoofverskille teenoor die voorloper TGV is die hoër togsnelheid (360 km/h teenoor die TGV se 320 km/h), meer sitplekke (615) en nuwe enjins wat - net soos by die Duitse hoësnelheidstrein ICE - nou oor die hele lengte van die trein verdeel is. In vergelyking met die TGV sal die AGV se nuwe enjins ook energiebesparend wees. Die AGV se massa is ook in vergelyking met ander tipes hoësnelheidstreine verminder sodat die totale energiebesparing tot 30 persent beloop.

Mark en klante

Die eerste AGV-prototipe, wat uit drie waens bestaan het, is op 5 Februarie 2008 naby La Rochelle amptelik bekend gestel.[2]

Die Italiaanse privaatmaatskappy Nuovo Trasporto Viaggiatori (NTV) was die eerste onderneming wat in Januarie 2008 25 treine met 11 seksies elk bestel het. Elkeen van die treine bied sitplek vir 500 passasiers. Die treine is vanaf die jaar 2012 vir spoorwegverbindings tussen Milaan, Turyn en Napels en tussen Rome en Venesië gebruik.[3] Die treine, wat volgens die kontrak 30 jaar lank deur Alstom gediens sal word, is teen 'n totale koste van € 1,5 miljard aangeskaf.[4]

Volgens persberigte oorweeg ook die Duitse spoorwegmaatskappy Deutsche Bahn AG[5] om AGV-treine aan te skaf asook die Franse lugredery Air France.[6]

Verwysings
  1. Der neue TGV heißt AGV. Frankfurter Allgemeine Zeitung Nr. 31, 6 Februarie 2008, bl. 14
  2. Frankreich setzt neuen ICE-Konkurrenten auf die Schiene. (FAZ.NET-video)
  3. Alstom 2017
  4. Ecco il treno di Montezemolo
  5. Bahn will nach 2010 in Frankreich fahren. Der Spiegel, nommer 7, 11 Februarie 2008, bl. 61
  6. Air France erwägt Kauf des AGV. Focus Money (aanlynuitgawe), 7 Februarie 2008
Hoëspoedtreine
Acela Express | Aérotrain | AGV | AVE | Eurostar | Eurostar Italia | Flytoget | Gautrein | InterCityExpress | JR-Maglev MLX01
Magneetsweeftreine | Pendolino | Sapsan |Shinkansen | Singapoerse MRT | TGV | Thalys | Treno Alta Velocità | Transrapid | X 2000
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.