Teumeureue atawa teumeurheue nan latènjih Microcos tomentosa, saboh jeunèh teunimoh nyang na di Acèh. Kayèm takalon bak teumeureue jitimoh bak uteuen muda (tamah) ngon lam lampôh soh. Lam bahsa Indonesia nanjih geukheun jeluak.
Meuri
Jeut taturi bak teumeureue nyan nibak curak bakjih nyang teupat, na cabeueng cit dari meuyub bak sampoe u pucôkjih. Kulét bak teumeureue na licén ngon watèe tagusuek lagèe banyum meusisék bacut, wareuna kulét jih keulabèe sukla, kulét nyan 'oh tapluek blah rot asoe dalam lagèe meuanoe ngon meubeuneung.
Ôn teumeureue jitimoh siôn-ôn bak tangkéjih. Ôn jih bulat timphiek ngon rayek ôn nyan ubé paleuet, binèh ôn meureunèk, meuyo tageusuek ônjih meunyum gasa lagèe meuanoe. Wareuna ôn teumeureu mirah atawa coklat watèe mantong ôn putik, lheueh nyan ôn mirah nyan meuubah jeuet keu ijô. Meunyo tapriek ôn nyan hana meugeutah.
Bungong teumeureue nyan ubeut ngon lam saboh bungong na 5 ôn ulah (kulahkama), wareuna bungongjih kunèng. Bak tangké bungong meubulèe nyang leukang watèe tagusuek. Bungongjih meukarang bak ujông tangké, lam saboh karang na 10-15 boh bungong.
Boh teumeureue rupajih bulat, aneuk jih kreueh. Jan tapuliek boh nyan lagèe na tapéh nyang lipéh meusalôb aneuk. Bohjih nyang putik wareuna ijô, ngon meugantoe jeut keu itam jan bohnyan kamasak. Kayém boh teumeureue nyang ka masak jipot lé aneuk miet keu jipajôh, nyum boh teumeureu masak nyan masam mamèh. Boh nyang putik jeut keu ayeum beudé chok (ayeuem beudé) nyang jipeugot nibak jaroe trieng.