Iléh raya

Iléh (Latèn Anguilla marmorata) keuluarga anguillid, nakeuh saboh jeunèh eungkôt paya atawa ië tabeuë nyang na di Acèh. Rupa eungkôt seupat nyan nakeuh : tubôhjih bulat panyang, na sirip bak ruëng ngon dimeuyub pruëtjih nyang meusambông ngon ikujih. Meunyoë get tapeurati iléh nyan na sisék lagèë ukèe halôih lagèe teupula lam kulétjih. Wareunajih keulabèe ngon na lagèe plang bak tubôhjih. Panyang tubôhjih sampoë trôh 2 mètè ngon geuhon jih trôh 20,5 kg, biasajih nyang rayek lagèe nyan nakeuh iléh jeunèh agam, ngon tubôh nyang ubénan raya jeuët takheun eungkôt nyan nyang paléng rayek lam bandéng ngon keuluarga anguilliddi Acèh nyang laén lagèe Lijeuë (Anguilla bengalensis) ngon Kirèë Anguilla bicolor. Masa udép iléh nyan pih na nyang trôh 40 thôn.[1]

Eumpeuën

Eungkôt Iléh galak that jiudép lam kruëng nyang meubatèe seubab le udeuëng ië tabeuë nyang jeuët keu eumpeuën utamajih bak kruëng meubatèe. Seubagoë jeunèh eungkôt karnivora atawa jeunèh makhluk udép nyang pajôh meunatang, laén nibak jipajôh udeuëng, iléh nyan jipajôh cit meunatang ië nyang laén lagèe biëng ngon eungkôt. Jiteubiët lam umpungjih keu jimita eumpeuën nakeuh watèe malam.[2] Nyankeuhjeuët di Acèh ureuëng nyang keuneuk mita iléh nyan geujak u keumawé atawa geujak theun bubè bak watèe malam.

That ramèe ureuëng Acèh nyang galak geupajôh iléh. Ngon seubab jareuëng that murumpok iléh nyang rayek, meuhat keuh meuhai that yum iléh nyan. Na cit keudèe meukat bu lagèe di dairah Tangsé nyang tiëp uroë geutaguën kuah iléh keu saboh peunajôh khusuih bak keudèe nyan, ngon that ramèe cit ureuëng nyang geusaja piyôh geukeumeung rasa kuah ilèh disinan.

Asai seunurat

  1. USGS. "Anguilla marmorata (fact sheet)". Diarsipkan dari versi asli tanggal 2009-05-10.
  2. Paul Harvey Skelton. A complete guide to the freshwater fishes of Southern Africa. Struik. hlm. 108. ISBN 978-1-86872-643-1.

Eu cit

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.