Ibnu Hajar Al-Asqalani (773 H/1372 M – 852 H/1449 M) nakeuh sidroë ulama rayek lam Madeuhab Syafi'i. Droëneuhnyan nakeuh sidroë ulama ileumèe hadits.[1] Nan leungkap droëneuhnyan nakeuh Syihabuddin Abul Fadhl Ahmad bin Ali bin Muhammad bin Muhammad bin Ali bin Mahmud bin Ahmad bin Hajar, droëneuhnyan leubèh meusyeuhu ngon nan Ibnu Hajar al-Asqalani saweuëb teumpat neulahé seureuta indatu neuh teuka nibak nanggroë Ashqalan, Palestina.[2] Kitab seunurat droëneuhnyan neubôh nan Fathul Bari, kitab nyoë nakeuh saboh kitab nyang that leungkap nibak ubéna kitab-kitab laén bak syarèh kitab Hadits Shahih Bukhari nyang tom geusurat.

Masa Neujak Meununtut ileumèe

Gobnyan awai that geujak meununtut ileumèe agama di Nanggroë Meusé, lheuëh nyan neujak meudagang u mumacam nanggroë Islam nyang laén. Ubéna nanggroë nyang tom neujak meudagang keu mita ileumèe agama nakeuh u :

  • Dua tanoh hareuëm (Al-Haramain), Makkah ngon Madinah. Gobnyan neuduëk di nanggroë Makkah al Mukarramah ngon na neuseumayang Tarawèh di Meuseujid al-Haram nibak thôn 785 H. Nibak masa nyan umu gobnyan nakeuh 12 thôn. Disinan gobnyan neubeuët kitab Shahih Bukhari nibak gurèe gobnyan Syèh Al-Muhaddits ‘Afifuddin an-Naisaburi al-Makki. Lheuëh nyan gobnyan na meupadum go teuk neujak u Makkah keu neujak peubuët ibadah haji ngon umrah.
  • Damaskus, disinoë gobnyan geumeugurèe bak Syèh Ibnu Mulaqqin ngon Syèh Al-Bulqini.
  • Baitul Maqdis, ngon ubéna nanggroë di Palestina pih kalheuh neujak, lagèe Nablus, Khalil, Ramallah ngon Ghuzzah. Nibak ubéna nanggroë di Palestina gobnyan neujak meurumpok ngon mandum ulama keu neutuëng ileumèe ngon neucok manfa'at.
  • Shan’a ngon meupadum boh nanggroë laén di Yaman nacit neujak mita ileumèe nibak ulama disinan.

Keubit yôh masa putik neuh hana sagai-sagai neupiyôh bak neumeudagang ngon neujak tuëng ileumèe langsông nibak ubéna ulama chik bak masa nyan, meusampoë ngon nyankeuh gobnyan dudoë jeuët keu sidroë ulama nyang that luah ileumèe geuh.

Seunurat Kitab

Ibnu Hajar phôn neuseumurat kitab yôh masa umu neuhnyan mantong 23 thôn, lheuëh nibak nyan hana sagai cré udép neuh keu neuseumurat sampoë masa teuka ajai droëneuhnyan. Meusampoë jeuët keu kayém that nibak masa nyan ubéna Raja seureuta ubéna 'Amir di nanggroë Islam keubit galak that bak meutuka-tuka hadiah ngon peuneujôk Kitab nyang geusurat lé Ibnu Hajar. Bak peuneugah aneuk murid neuh, Syèh Imum As-Sakhawi, jumeulah kitab nyang neusurat lé Ibnu Hajar nakeuh 270 boh kitab. Rab mandum asoë kitab nyan nakeuh lam bhah Ileumèe Hadits, nyang geusurat lam curak riwayat ngon dirayat. Kitab droëneuhyan nyang that geuthèe nakeuh :

  • Fathul Bari
  • Tahdzib at-Tahdzib
  • Al-Ishabah fi Tamyiz ash-Shahabah, ènsiklopèdi riwayat udép sahbat nabi.
  • Bulughul Maram
  • Al-Isti'dad Liyaumil Mii'aad
  • Nukhbatul Fikr, (bhah Musthalah hadits)

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.